وزیراعظم شہباز شریف کا ایران میں موجود پاکستانی زائرین کی حفاظت اور واپسی کے لیے فوری اقدامات کا حکم
وزیراعظم محمد شہباز شریف نے جمعہ کے روز ایران میں موجود پاکستانی زائرین کی حفاظت اور ان کی جلد واپسی کے لیے تمام متعلقہ اداروں کو ہر ممکن معاونت فراہم کرنے کی ہدایت جاری کی ہے۔ وزیراعظم کی ہدایات پر عمل درآمد کرتے ہوئے وزارتِ خارجہ میں ایک کرائسس مینجمنٹ سیل قائم کر دیا گیا ہے جو صورتحال پر نظر رکھے گا اور امدادی سرگرمیوں میں رابطہ کاری کرے گا۔ تہران میں موجود پاکستانی سفارتخانے کو بھی چوکنا رہنے اور زائرین کو مکمل تعاون فراہم کرنے کی ہدایت کی گئی ہے۔
وزیراعظم نے زور دیا کہ:ایران میں موجود ہر پاکستانی شہری کی سلامتی کو یقینی بنانے کے لیے فوری اور مؤثر اقدامات کیے جائیں۔
انہوں نے یہ بھی حکم دیا کہ:واپسی کے عمل میں ہر ممکن سہولت فراہم کی جائے اور تمام دستیاب وسائل استعمال کیے جائیں۔
مزید کہا گیا کہ جب تک خطے کی صورتحال معمول پر نہیں آتی، وزارت خارجہ اور ایران میں پاکستانی مشن ہائی الرٹ پر رہیں گے اور زائرین سے مسلسل رابطے میں رہیں گے۔
