اسلام آباد – صدر آصف علی زرداری نے پاکستان اور روس کے درمیان تجارت، سرمایہ کاری، ٹیکنالوجی اور عوامی روابط سمیت مختلف شعبوں میں تعاون کو فروغ دینے پر زور دیا ہے۔
انہوں نے یہ بات اسلام آباد میں روس کے 35ویں یومِ آزادی کے موقع پر منعقدہ ایک تقریب سے خطاب کرتے ہوئے کہی۔
صدر زرداری نے روسی صدر ولادیمیر پیوٹن، پاکستان میں روس کے سفیر البرٹ خوروف اور روسی عوام کو دلی مبارکباد پیش کرتے ہوئے کہا کہ پاکستان اس موقع پر روس کے ساتھ اظہارِ یکجہتی کرتا ہے۔
انہوں نے پاکستان اور روس کے درمیان بڑھتے ہوئے تعلقات کا ذکر کرتے ہوئے کہا کہ اعلیٰ سطحی روابط کے تسلسل نے باہمی سمجھ بوجھ اور تعاون کی مضبوط بنیاد فراہم کی ہے۔ صدر نے کہا کہ دونوں ممالک علاقائی اور عالمی سطح پر تعاون جاری رکھے ہوئے ہیں اور امید ظاہر کی کہ یہ دوستی آنے والے برسوں میں مزید مضبوط ہوگی۔
صدر زرداری نے کہا: "ہمیں اپنے دونوں ممالک کے درمیان تفہیم اور تعاون کے پل تعمیر کرنے کے عزم کی تجدید کرنی چاہیے۔”
قبل ازیں روسی سفیر البرٹ خوروف نے استقبالیہ خطاب میں پاک روس تعلقات کی رفتار کو تسلی بخش قرار دیتے ہوئے تعلیم، سفارت کاری اور ترقی سمیت مختلف شعبوں میں جاری پیش رفت کا ذکر کیا۔ انہوں نے عالمی سطح پر پاکستان کے لیے روس کی حمایت کا اعادہ کیا اور دوطرفہ تعلقات کے مزید فروغ کے عزم کا اظہار کیا۔
