دانشگاه (نیوز ڈیسک): ایمنسٹی انٹرنیشنل کی سیکریٹری جنرل، ایگنَیس کالا مارڈ نے بحری جہاز مادلین کو روکنے کے اسرائیلی اقدام کی مذمت کرتے ہوئے اسے بین الاقوامی قانون کی خلاف ورزی قرار دیا ہے۔
انہوں نے سوشل میڈیا پلیٹ فارم ایکس پر اپنے بیان میں کہا:
"بطور قابض طاقت (جیسا کہ عالمی عدالت انصاف نے تسلیم کیا ہے)، اسرائیل پر یہ قانونی ذمہ داری عائد ہوتی ہے کہ وہ غزہ کے شہریوں کو خوراک اور ادویات کی فراہمی کو یقینی بنائے۔ اسے مادلین کو اپنی انسانی امداد غزہ پہنچانے دینی چاہیے تھی۔”
کالا مارڈ نے دیگر ممالک سے بھی مطالبہ کیا کہ وہ اب تک جو کچھ کر چکے ہیں، اس سے کہیں بڑھ کر اقدامات کریں۔
انہوں نے مزید کہا:
"یہ نسل کشی جاری ہے۔ فوجی قبضہ برقرار ہے۔ نسلی امتیاز کا نظام نافذ ہے۔ غزہ میں فلسطینی فاقہ کشی کا شکار ہیں۔ امدادی کارکنوں کو نشانہ بنایا جا رہا ہے۔ انسانی ہمدردی کی بنیاد پر فراہم کی جانے والی امداد کو روکا جا رہا ہے۔”
