دانشگاه (نیوز ڈیسک) اسلام آباد — پاکستان سے سیمنٹ کی برآمدات میں رواں مالی سال کے ابتدائی 11 ماہ کے دوران سالانہ بنیادوں پر 26 فیصد اضافہ ریکارڈ کیا گیا ہے۔
آل پاکستان سیمنٹ مینوفیکچررز ایسوسی ایشن کے جاری کردہ اعداد و شمار کے مطابق، جولائی 2024 سے مئی 2025 کے عرصے میں ملک سے 83 لاکھ 48 ہزار میٹرک ٹن سیمنٹ برآمد کیا گیا، جبکہ گزشتہ مالی سال کی اسی مدت میں یہ حجم 66 لاکھ 37 ہزار میٹرک ٹن رہا تھا۔
مئی 2025 کے دوران سیمنٹ کی برآمدات کا حجم 9 لاکھ 89 ہزار میٹرک ٹن رہا، جو مئی 2024 کے مقابلے میں 7 فیصد زائد ہے۔ گزشتہ سال مئی میں 9 لاکھ 22 ہزار میٹرک ٹن سیمنٹ برآمد کیا گیا تھا۔
مزید برآں، اپریل 2025 کے مقابلے میں مئی 2025 میں سیمنٹ کی برآمدات میں ماہانہ بنیادوں پر 20 فیصد اضافہ دیکھا گیا۔ اپریل میں برآمدات کا حجم 8 لاکھ 26 ہزار میٹرک ٹن ریکارڈ کیا گیا تھا۔
