دانشگاہ (ویب نیوز) : یمنی مسلح افواج نے مقبوضہ فلسطینی علاقوں میں دشمن کے اہم مراکز پر چار کامیاب عسکری کارروائیوں کا اعلان کیا ہے، جن میں "بن گوریون ایئرپورٹ” (لود)، یافا، اشدود اور ام الرشراش (ایلات) شامل ہیں۔
اتوار کے روز جاری کردہ بیان میں بتایا گیا کہ بیلسٹک میزائل یونٹ نے مقبوضہ یافا میں واقع لود ایئرپورٹ کو ایک ہائپر سونک میزائل سے نشانہ بنایا، جس سے ہدف کامیابی سے تباہ ہوا۔ اس حملے کے نتیجے میں لاکھوں صہیونی پناہ گاہوں کی طرف بھاگ گئے اور ہوائی اڈے کی تمام تر سرگرمیاں مفلوج ہو گئیں۔
اسی دوران، ڈرون یونٹ نے تین الگ الگ کارروائیوں میں بغیر پائلٹ طیاروں کے ذریعے یافا، اشدود اور ایلات میں دشمن کے اہم اہداف کو نشانہ بنایا۔
بیان میں زور دیا گیا کہ لود ایئرپورٹ پر جزوی فضائی پابندی کے بعد، یمن آئندہ دنوں میں مکمل پرواز معطلی نافذ کرنے کی کوشش کر رہا ہے۔ ان فضائی کمپنیوں کو انتباہ جاری کیا گیا ہے جو اب تک اس پابندی پر عمل نہیں کر رہیں کہ وہ اپنی پروازوں پر نظرثانی کریں، تاکہ اپنے عملے اور مسافروں کی حفاظت یقینی بنا سکیں۔
یمنی مسلح افواج نے واضح کیا کہ جب تک غزہ پر حملے بند نہیں ہوتے اور محاصرہ ختم نہیں کیا جاتا، ان کی کارروائیاں جاری رہیں گی۔
اکتوبر 2023 میں اسرائیل کی غزہ میں جارحیت کے آغاز کے بعد سے یمنی افواج نے فلسطینی عوام کی حمایت میں اپنی عسکری کارروائیاں تیز کر دی ہیں۔ "وعدہ شدہ فتح اور مقدس جہاد” کے نام سے جاری اس مہم میں بیلسٹک و ڈرون حملوں کے علاوہ بحری و فضائی ناکہ بندی شامل ہے، جن کا مقصد اسرائیل پر دباؤ ڈال کر جارحیت کا خاتمہ اور غزہ کا محاصرہ ختم کرانا ہے۔
