دانشگاہ (ویب ڈیسک) – فلسطینی قیدیوں کے میڈیا آفس نے انکشاف کیا ہے کہ اسرائیل غزہ کی پٹی سے گرفتار فلسطینیوں پر نہایت ظالمانہ اور بہیمانہ تشدد کے طریقے اپنا رہا ہے۔ ان قیدیوں کو جسمانی اور نفسیاتی اذیت کے ساتھ ساتھ جنسی حملوں اور غیر انسانی سلوک کا بھی سامنا ہے۔ رپورٹ کے مطابق، گرفتار فلسطینیوں کو حساس اعضا پر مار پیٹ اور برقی جھٹکے دیے جاتے ہیں، انہیں گھنٹوں تک ہاتھوں کے بل لٹکایا جاتا ہے، اور خوراک، غسل و عبادت جیسے بنیادی انسانی حقوق سے محروم رکھا جاتا ہے۔ اس کے علاوہ انہیں پولیس کتوں کے ذریعے دھمکایا اور زخمی کیا جاتا ہے جبکہ کئی قیدیوں کو برہنہ، بندھے اور ذلت آمیز انداز میں منتقل کیا جا رہا ہے۔
فلسطینی قیدیوں کے میڈیا آفس کے مطابق، صرف مئی کے مہینے میں اسرائیلی افواج نے غزہ سے 700 سے زائد افراد کو گرفتار کیا، جس کے بعد اب تک جنگ کے آغاز سے لے کر کل گرفتار شدگان کی تعداد 12,000 سے تجاوز کر چکی ہے۔ موجودہ وقت میں بھی 3,500 سے زائد فلسطینی قید میں ہیں، جن میں سے 1,846 افراد کو "غیر قانونی جنگجو” قرار دے کر ان کے تمام قانونی حقوق چھین لیے گئے ہیں۔ رپورٹ میں یہ بھی بتایا گیا ہے کہ اب تک کم از کم 44 قیدیوں نے حراست میں موت پائی ہے۔ یہ تمام حقائق اسرائیل کے ان اقدامات کی گواہی دیتے ہیں جو نہ صرف انسانی حقوق کی خلاف ورزی ہیں بلکہ بین الاقوامی قوانین کی بھی کھلی پامالی ہیں۔
