اسپین: پارلیمنٹ نے اسرائیل کے خلاف اسلحہ پابندی کے بل کی منظوری کا عمل تیز کر دیا
انادولو ایجنسی کی رپورٹ کے مطابق، منگل کے روز ہسپانوی پارلیمنٹ نے اسرائیل کے خلاف اسلحے کی پابندی سے متعلق بل کی منظوری کے عمل کو تیز کرنے کا فیصلہ کیا۔
اسپین کے مؤقر اخبار ال منڈو کے مطابق، بائیں بازو کی جماعتوں — سومار، پوڈیموس، ریپبلکن لیفٹ آف کیٹالونیا (ERC)، باسکی جماعت EH Bildu، اور گلیشین نیشنلسٹ بلاک (BNG) — نے پارلیمانی بیورو کو ایک درخواست جمع کرائی، جس میں اس بل کو فوری اور ترجیحی بنیادوں پر منظور کرنے کا مطالبہ کیا گیا۔
اس درخواست کو وزیرِاعظم پیدرو سانچیز کی سوشلسٹ پارٹی کی حمایت بھی حاصل تھی، جس کے بعد اسے منظور کر لیا گیا۔ اس منظوری کے نتیجے میں بل کی منظوری کے عمل کا وقت نصف ہو گیا ہے اور اس پر تیزی سے عملدرآمد ممکن ہو گیا ہے۔
یہ پیش رفت اُس وقت سامنے آئی جب 20 مئی کو پارلیمنٹ نے ایک غیر پابند قرارداد منظور کی تھی، جس میں حکومت سے مطالبہ کیا گیا تھا کہ وہ اسرائیل کی غزہ میں فوجی کارروائیوں کے ردعمل میں اسلحہ کی برآمد پر پابندی عائد کرے۔
یہ قرارداد حکومتی اتحاد میں شامل بائیں بازو کے اتحاد سومار، حزبِ اختلاف کی جماعت پوڈیموس، اور ریپبلکن لیفٹ آف کیٹالونیا (ERC) نے پیش کی تھی، جو 176 کے مقابلے میں 171 ووٹوں سے منظور ہوئی۔
یہ اقدام یورپ بھر میں اسرائیل کے ساتھ فوجی تعلقات پر نظرثانی کے مطالبات کے بڑھتے ہوئے دباؤ کا عکاس ہے۔
