سی پیک تعاون میں نئی پیش رفت، 22 چینی کمپنیوں کی ملازمتیں، 400 نوجوانوں کو موقع پر روزگار
اسلام آباد – چین نے پاکستان کے ساتھ دوطرفہ تعلقات کو مزید مستحکم بنانے کے لیے منگل کے روز ایک اہم اقدام کرتے ہوئے پاکستانی نوجوانوں کے لیے روزگار کے نئے مواقع کھولنے کا اعلان کیا ہے۔
اسلام آباد میں نیشنل ووکیشنل اینڈ ٹیکنیکل ٹریننگ کمیشن (NAVTTC) اور پاکستان میں چینی چیمبر آف کامرس کے اشتراک سے منعقدہ جاب فیئر سے خطاب کرتے ہوئے پاکستان میں چین کے سفیر جیانگ زائی دونگ نے کہا کہ ہنرمند پاکستانی افرادی قوت کو ملازمت کے مواقع فراہم کرنا دونوں ممالک کے دیرینہ تعلقات کو مزید گہرا کرنے کی کلید ہے۔
انہوں نے کہا کہ چینی کمپنیاں پاکستان میں سرمایہ کاری اور روزگار کے مواقع پیدا کرنے کے لیے تیار ہیں، بشرطیکہ انہیں سازگار اور مستحکم کاروباری ماحول میسر ہو۔ انہوں نے پاکستان کی آبادی کے 60 فیصد سے زائد نوجوانوں پر مشتمل ہونے کو ایک اہم اثاثہ قرار دیا اور اسے انسانی وسائل کے مؤثر استعمال کا نادر موقع قرار دیا۔
جاب فیئر کے دوران 3000 سے زائد نوجوانوں نے درخواستیں جمع کرائیں، جن میں سے 500 کو موقع پر ہی چینی کمپنیوں نے ملازمتوں کی پیشکش کی۔ اس موقع پر ایک اہم پیش رفت کے طور پر چینی کمپنی تھانگ انٹرنیشنل اور ایک پاکستانی ووکیشنل ادارے کے درمیان مفاہمتی یادداشت پر دستخط کیے گئے، جس کا مقصد نوجوانوں کو آئی ٹی اور ڈیجیٹل مہارتوں کی تربیت فراہم کرنا ہے۔
وفاقی وزیر تعلیم خالد مقبول صدیقی نے تقریب میں شرکت کی اور اس اقدام کو سراہا۔ انہوں نے کہا کہ چین ایک ابھرتی ہوئی معاشی قوت ہے، جبکہ پاکستان معاشی ترقی کے ایک اہم مرحلے سے گزر رہا ہے، اور ووکیشنل تربیت کے شعبے میں باہمی تعاون پاکستان کی مکمل اقتصادی صلاحیت کو اجاگر کر سکتا ہے۔
چینی سفیر نے کہا کہ چین میں 11,000 سے زائد ووکیشنل ادارے موجود ہیں، جو ہر سال تقریباً ایک کروڑ ہنرمند افراد کو تربیت دیتے ہیں۔ انہوں نے پاکستانی نوجوانوں پر زور دیا کہ وہ سائنس، ٹیکنالوجی اور اختراع کے شعبوں میں مواقع تلاش کریں، جہاں چین تعاون بڑھانے کے لیے تیار ہے۔
وزیر مملکت برائے تعلیم و تربیت، وجیہہ قمر نے تقریب کے افتتاح کے موقع پر کہا کہ یہ جاب فیئر صرف بھرتی کا عمل نہیں بلکہ قومی اعتماد کا اظہار ہے۔ انہوں نے کہا:
"ہمارے نوجوان صرف روزگار کے متلاشی نہیں بلکہ پاکستان کے مستقبل کے معمار ہیں۔ پاکستان ایک باصلاحیت اور باہمت قوم ہے، اور سی پیک صرف ایک سڑک نہیں بلکہ خوشحالی کا روڈ میپ ہے۔”
NAVTTC کی چیئرپرسن گل منہ بلّال نے خطاب میں بتایا کہ کراچی کے 20 ووکیشنل اداروں نے تھانگ انٹرنیشنل کے ساتھ معاہدے کیے ہیں تاکہ پاکستانی نوجوانوں کو آئی ٹی اور ڈیجیٹل شعبوں میں تربیت دی جا سکے۔ انہوں نے "سمارٹ لیبر فورس” کے تصور کو متعارف کروایا جو صرف ہنر مند ہی نہیں بلکہ بدلتے ہوئے تکنیکی تقاضوں سے ہم آہنگ بھی ہو۔
انہوں نے وزیر مملکت وجیہہ قمر کا شکریہ ادا کیا جن کی کوششوں سے مختصر وقت میں یہ فلاحی تقریب ممکن ہوئی۔ گل منہ بلّال نے بتایا کہ 22 چینی کمپنیوں کی شمولیت چینی سفارتخانے اور چیمبر آف کامرس کے تعاون سے ممکن ہوئی، اور اس موقع پر 400 امیدواروں کو فوری ملازمتیں دی گئیں۔ انہوں نے اعلان کیا کہ ملک کے دیگر شہروں میں بھی ایسے روزگار میلوں کا انعقاد کیا جائے گا۔
چینی چیمبر آف کامرس کے صدر وانگ ہوئی ہوا نے کہا کہ پاکستان میں موجود چینی کمپنیاں، خاص طور پر توانائی، تعمیرات اور آئی ٹی کے شعبوں میں، مقامی نوجوانوں کو روزگار فراہم کرنے میں دلچسپی رکھتی ہیں۔ انہوں نے تکنیکی اداروں کے درمیان ادارہ جاتی شراکت داری کو مستقبل کی افرادی قوت کی تیاری کے لیے اہم قرار دیا۔
NAVTTC کے ڈائریکٹر جنرل حیدر عباس نے اس جاب فیئر کو پاکستان کے معاشی اور فنی سفر کا نیا باب قرار دیا۔ انہوں نے کہا:
"یہ محض ایک تقریب نہیں بلکہ باہمی ترقی اور خوشحالی کا جشن ہے۔”
چینی اقتصادی مشیر یانگ گو یوآن نے اس فیئر کو پاکستانی تاریخ کا پہلا بڑا موقع قرار دیا جہاں چینی کمپنیوں نے براہ راست پاکستانی نوجوانوں سے ملاقات کی، ان کے سی ویز وصول کیے اور انٹرویوز کیے۔ وزیر مملکت وجیہہ قمر نے مختلف کمپنی اسٹالز کا دورہ کیا، جو حکومت کی نوجوانوں کی ترقی میں سنجیدگی کا مظہر ہے۔
