پاکستان کے ایٹمی تجربات کی یاد میں ملک بھر میں عام تعطیل
اسلام آباد – پاکستان میں آج (بدھ کے روز) یومِ تکبیر بھرپور قومی جوش و جذبے کے ساتھ منایا جا رہا ہے، تاکہ 28 مئی 1998 کو ہونے والے کامیاب ایٹمی تجربات کی تاریخی کامیابی کو خراجِ تحسین پیش کیا جا سکے۔ اس موقع پر ملک بھر میں عام تعطیل کا اعلان کیا گیا ہے۔
ستائیس سال قبل اسی روز، پاکستان دنیا کی ساتویں اور مسلم دنیا کی پہلی ایٹمی قوت کے طور پر ابھرا، جو ملکی دفاعی تاریخ میں ایک سنگِ میل کی حیثیت رکھتا ہے۔
یہ ایٹمی تجربات بلوچستان کے ضلع چاغی میں واقع راس کوہ کے پہاڑوں میں کیے گئے، جنہیں معروف ایٹمی سائنسدان ڈاکٹر عبدالقدیر خان اور ڈاکٹر ثمر مبارک مند کی قیادت میں ایک ماہر ٹیم نے انجام دیا۔ ان تجربات نے پاکستان کے قومی خودمختاری، آزادی اور علاقائی سالمیت کے تحفظ کے عزم کو دنیا کے سامنے واضح کر دیا۔
پاکستان کے ایٹمی پروگرام کی بنیاد سابق وزیراعظم ذوالفقار علی بھٹو کے اس تاریخی عزم پر رکھی گئی، جنہوں نے کہا تھا کہ "ہم گھاس کھا لیں گے، لیکن ایٹم بم ضرور بنائیں گے”۔ برسوں بعد، اس وژن کو عملی شکل اُس وقت ملی جب اُس وقت کے وزیراعظم نواز شریف نے عالمی دباؤ اور پابندیوں کو نظرانداز کرتے ہوئے بھارت کے ایٹمی دھماکوں کے جواب میں پاکستان کے ایٹمی تجربات کی منظوری دی، جس سے خطے میں اسٹریٹجک توازن بحال ہوا۔
یومِ تکبیر قومی افتخار اور وحدت کی علامت ہے، جو قوم کو اُن قربانیوں اور عزم کی یاد دلاتا ہے جن کے باعث پاکستان ایک قابلِ اعتماد ایٹمی طاقت بن سکا۔
