وزیراعظم شہباز شریف کی پاک-بھارت کشیدگی کے دوران حمایت پر صدر الہام علیوف کا شکریہ
لاچین – پاکستان اور آذربائیجان نے منگل کے روز دوطرفہ ملاقات میں اسٹریٹجک شراکت داری کو باہمی مفاد پر مبنی سرمایہ کاری کے ذریعے وسعت دینے کے عزم کا اعادہ کیا۔
یہ اتفاق وزیراعظم شہباز شریف اور آذربائیجان کے صدر الہام علیوف کے درمیان آذربائیجان کے شہر لاچین میں ہونے والی ملاقات کے دوران طے پایا۔
دونوں رہنماؤں نے دوطرفہ تعلقات کے تمام پہلوؤں کا جائزہ لیا اور سیاسی، معاشی، دفاعی اور ثقافتی تعاون کے مسلسل بڑھتے ہوئے رجحان پر اطمینان کا اظہار کیا۔ وزیراعظم نے اس امر کو دہرایا کہ پاکستان اور آذربائیجان ہر مشکل وقت میں ایک دوسرے کے شانہ بشانہ کھڑے رہے ہیں اور یہ تعاون آئندہ بھی جاری رہے گا۔
وزیراعظم شہباز شریف نے حالیہ پاک-بھارت کشیدگی کے دوران آذربائیجان کی غیر متزلزل حمایت پر شکریہ ادا کرتے ہوئے، بھارتی اشتعال انگیزی کے مقابل پاکستان سے اظہار یکجہتی پر آذربائیجان کی قیادت اور عوام کے جذبات کو سراہا۔
انہوں نے کہا کہ آذربائیجان کے عوام نے بھارت کے خلاف ’’معرکۂ حق‘‘ میں پاکستان کی کامیابی کو اپنی خوشی سمجھ کر منایا۔
آذربائیجان نے پاکستان میں سرمایہ کاری سے متعلق پیشرفت کے لیے وفود کے تبادلوں پر آمادگی ظاہر کی، اور اس حوالے سے جلد اعلیٰ سطحی مذاکرات منعقد کیے جائیں گے۔
یہ ملاقات پاکستان، آذربائیجان اور ترکی کے سہ فریقی اجلاس سے ایک روز قبل ہوئی، جو آذربائیجان کے یومِ آزادی کے موقع پر منعقد ہو رہا ہے، جس سے اس ملاقات کو ایک علامتی اہمیت بھی حاصل ہو گئی ہے۔ وزیراعظم نے صدر علیوف اور آذربائیجان کے عوام کو ان کے قومی دن پر دلی مبارکباد پیش کی۔
دونوں رہنماؤں نے علاقائی استحکام، مشترکہ خوشحالی، اور بین الاقوامی امور پر اصولی موقف اپنانے کے لیے مربوط کوششوں کی ضرورت پر زور دیا۔
ملاقات کے اختتام پر وزیراعظم شہباز شریف اور صدر علیوف نے پاکستان-آذربائیجان شراکت داری کو مزید گہرا کرنے اور دوطرفہ و علاقائی سطح پر مشترکہ اہداف کے حصول کے لیے قریبی تعاون جاری رکھنے کے عزم کا اعادہ کیا۔
وزیراعظم نے صدر الہام علیوف کا ایک بار پھر پاکستان کی حالیہ پاک-بھارت کشیدگی کے دوران غیر متزلزل حمایت پر شکریہ ادا کیا۔
سماجی رابطوں کی ویب سائٹ ایکس پر اپنے پیغام میں وزیراعظم شہباز شریف نے کہا کہ پاکستان اور آذربائیجان نے تمام شعبوں میں تعلقات کو مزید گہرا کرنے اور خطے میں امن و خوشحالی کے لیے مل کر کام جاری رکھنے کے مشترکہ عزم کی توثیق کی ہے۔
انہوں نے کہا کہ یہ بھائی چارے کی مثالی روح ان محبت بھرے جذبات سے جنم لیتی ہے جو دونوں ممالک کے عوام کے دلوں کو ایک ساتھ دھڑکنے پر مجبور کرتے ہیں۔
وزیراعظم نے کہا کہ انہیں اپنے بھائی صدر الہام علیوف سے خوبصورت اور پرامن شہر لاچین میں ملاقات کا اعزاز حاصل ہوا۔
وزیراعظم شہباز شریف لاچین، آذربائیجان پہنچ چکے ہیں جہاں وہ پاکستان-ترکی-آذربائیجان سہ فریقی سربراہی اجلاس میں شرکت کریں گے۔
لاچین پہنچنے پر آذربائیجان کے وزیر خارجہ جیہون بایراموف نے وزیراعظم کا استقبال کیا۔
وزیراعظم شہباز شریف آذربائیجان کے صدر الہام علیوف اور ترک صدر رجب طیب اردوان کے ہمراہ سہ فریقی اجلاس میں شرکت کریں گے۔ اس موقع پر ان کی صدر علیوف سے دوطرفہ ملاقات بھی طے ہے۔
