تہران، 26 مئی (اے پی پی) — پاکستان کے وزیراعظم محمد شہباز شریف نے ایرانی سپریم لیڈر آیت اللہ سید علی خامنہ ای سے تہران میں ایک اہم ملاقات میں اس عزم کا اعادہ کیا ہے کہ پاکستان، خطے کی موجودہ پیچیدہ جغرافیائی و سیاسی صورتحال کے باوجود، ایران کے ساتھ تزویراتی تعاون کو مزید گہرائی اور وسعت دینے کے لیے پرعزم ہے۔
یہ ملاقات وزیراعظم کے سرکاری دورہ ایران کے دوران ہوئی، جس میں ان کے ہمراہ چیف آف آرمی اسٹاف جنرل سید عاصم منیر، نائب وزیراعظم و وزیر خارجہ سینیٹر اسحاق ڈار، وفاقی وزیر داخلہ سید محسن رضا نقوی اور وفاقی وزیر اطلاعات عطاء اللہ تارڑ بھی موجود تھے۔
ملاقات کا آغاز وزیراعظم کی جانب سے ایرانی سپریم لیڈر کے لیے گہرے احترام اور عقیدت کے اظہار سے ہوا۔ وزیراعظم نے آیت اللہ خامنہ ای کو امت مسلمہ کی رہنمائی کا ایک معتبر مینار قرار دیتے ہوئے ان کے فکری و اخلاقی کردار کو خراج تحسین پیش کیا۔ اس دوران وزیراعظم نے بھارت کی توسیع پسندانہ پالیسیوں، خطے میں اس کے بالادستی کے عزائم اور حالیہ سرحدی کشیدگیوں پر بھی روشنی ڈالی، اور اس حوالے سے ایران کی مسلسل حمایت پر ایرانی قیادت کا شکریہ ادا کیا۔
وزیراعظم نے کہا کہ پاکستان ہمیشہ ایک پُرامن اور خوشحال خطے کا خواہاں رہا ہے اور اس مقصد کے لیے ایران کے ساتھ قریبی تعاون ناگزیر ہے۔ انہوں نے دونوں ممالک کے مابین تعلقات کو بلند ترین سطح تک لے جانے کے لیے حکومتی کوششوں سے سپریم لیڈر کو آگاہ کیا، اور اس بات پر زور دیا کہ اسٹریٹجک اشتراک خطے میں پائیدار امن اور اقتصادی ترقی کا ضامن بن سکتا ہے۔
شہباز شریف نے ایران اور امریکہ کے درمیان جاری جوہری مذاکرات میں ایرانی قیادت کی دوراندیشی اور حکمتِ عملی کو سراہتے ہوئے امید ظاہر کی کہ ایک تعمیری معاہدہ نہ صرف دونوں ممالک کے لیے فائدہ مند ہوگا بلکہ خطے میں بھی استحکام اور سلامتی کو فروغ دے گا۔
سپریم لیڈر آیت اللہ خامنہ ای نے وزیراعظم شہباز شریف کے خیالات کو سراہا اور علاقائی امن کے لیے ان کی کوششوں کو قدر کی نگاہ سے دیکھا۔ انہوں نے پاکستان کی ترقی اور عوامی خوشحالی کے لیے دعا کرتے ہوئے دوطرفہ تعلقات کو مزید مستحکم بنانے کے عزم کا اعادہ کیا۔
ملاقات کے اختتام پر وزیراعظم نے آیت اللہ خامنہ ای کی جانب سے علامہ اقبال کی شاعری سے گہرے تعلق کو سراہا اور انہیں پاکستان کے سرکاری دورے کی دعوت بھی دی۔
