غزہ سٹی میں ایک اسکول، جو جنگ زدہ شہریوں کے لیے پناہ گاہ میں تبدیل کیا گیا تھا، اسرائیلی فضائی حملے کا نشانہ بن گیا، جس کے نتیجے میں کم از کم 36 فلسطینی شہید ہو گئے، جن میں کئی معصوم بچے بھی شامل ہیں۔ حملے کے بعد عمارت میں آگ بھڑک اٹھی، اور ملبے تلے مزید افراد کے دبے ہونے کا خدشہ ظاہر کیا جا رہا ہے۔ پیر کی صبح سے شروع ہونے والے اسرائیلی حملوں میں اب تک مجموعی طور پر 50 سے زائد فلسطینی جاں بحق ہو چکے ہیں۔
ادھر، غزہ میں سرگرم ایک متنازع امریکی حمایت یافتہ امدادی تنظیم کے سربراہ نے اپنے عہدے سے استعفیٰ دے دیا ہے۔ انہوں نے اپنے فیصلے کی وضاحت کرتے ہوئے کہا کہ وہ ادارے کی آزادی، غیر جانبداری اور پیشہ ورانہ معیار پر بڑھتی ہوئی مداخلت پر شدید تحفظات رکھتے ہیں، جس کے باعث وہ اپنے منصب پر مزید کام جاری نہیں رکھ سکتے۔
دوسری جانب اسپین نے عالمی برادری پر زور دیا ہے کہ وہ اسرائیل پر پابندیاں عائد کرنے پر سنجیدگی سے غور کرے۔ میڈرڈ میں یورپی اور عرب ممالک کے 20 وزرائے خارجہ کی موجودگی میں ہونے والے اجلاس میں اسپین نے دو ریاستی حل کی حمایت کا اعادہ کیا اور مسئلہ فلسطین کے منصفانہ حل کے لیے عملی اقدامات پر زور دیا۔
غزہ کی وزارت صحت کے مطابق، 7 اکتوبر 2023 سے جاری اسرائیلی جنگ میں اب تک کم از کم 53,939 فلسطینی شہید اور 122,797 سے زائد زخمی ہو چکے ہیں۔ دریں اثنا، غزہ کے حکومتی میڈیا آفس نے بتایا ہے کہ شہدا کی تعداد 61,700 سے تجاوز کر گئی ہے، کیونکہ ہزاروں افراد اب بھی ملبے تلے دبے ہوئے ہیں اور ان کے زندہ بچنے کی امیدیں دم توڑ چکی ہیں۔
یاد رہے کہ 7 اکتوبر 2023 کو حماس کی قیادت میں ہونے والے حملوں کے دوران اسرائیل میں تقریباً 1,139 افراد ہلاک اور 200 سے زائد کو یرغمال بنا لیا گیا تھا۔
