اسلام آباد – وزیرِ اعظم شہباز شریف اتوار (آج) 25 مئی سے 30 مئی تک ترکی، ایران، آذربائیجان اور تاجکستان کے دورے پر روانہ ہوں گے۔
وزیرِ اعظم آفس کے میڈیا وِنگ کی جانب سے جاری بیان کے مطابق، "دورے کے دوران وزیرِ اعظم ان ممالک کے رہنماؤں سے دو طرفہ تعلقات اور علاقائی و عالمی اہمیت کے امور پر جامع گفتگو کریں گے۔”
اپنے اس دورے کے دوران، وزیرِ اعظم ان دوست ممالک کی جانب سے بھارت کے ساتھ حالیہ بحران کے دوران پاکستان کی حمایت پر اُن کا شکریہ بھی ادا کریں گے۔ وہ 29 اور 30 مئی کو تاجکستان کے دارالحکومت دوشنبے میں ہونے والی بین الاقوامی گلیشیئر کانفرنس میں بھی شرکت کریں گے۔
وزیرِ اعظم کی نائلہ کیانی کو کانچن جنگا سر کرنے پر مبارکباد
وزیرِ اعظم محمد شہباز شریف نے ہفتے کے روز کوہ پیما نائلہ کیانی کو دنیا کی تیسری بلند ترین چوٹی "کانچن جنگا” سر کرنے پر سراہا اور ان کی کامیابی کو پاکستان کے لیے قابلِ فخر قرار دیا۔
وزیرِ اعظم آفس کے میڈیا وِنگ کی جانب سے جاری پریس ریلیز میں بتایا گیا ہے کہ وزیرِ اعظم نے نائلہ کیانی کو ماؤنٹ کانچن جنگا سر کرنے والی پہلی پاکستانی خاتون بننے پر مبارکباد دی۔
وزیرِ اعظم نے کہا، "پاکستانی ہر شعبۂ کھیل میں ملک کا نام روشن کر رہے ہیں۔”
انہوں نے مزید کہا کہ "مشکل کھیلوں، جیسے کوہ پیمائی میں پاکستانی خواتین کا ریکارڈ قائم کرنا ہمارے لیے حوصلے اور طاقت کا باعث ہے۔”
