عالمی ادارہ صحت (WHO) اور حکومت پاکستان نے ملک بھر میں 26 نئے ویکسینیشن مراکز قائم کرنے کا اعلان کیا ہے، جو پسماندہ علاقوں میں 7 لاکھ 50 ہزار سے زائد افراد تک صحت کی سہولیات پہنچانے کا ہدف رکھتے ہیں۔
یہ اہم اقدام گاؤی (GAVI) ویکسین الائنس کی مالی معاونت سے پاکستان کے ایکسپینڈڈ پروگرام آن امیونائزیشن (EPI) کو مضبوط بنانے اور ضروری صحت کی سہولیات تک رسائی بہتر بنانے کے لیے کیا جا رہا ہے۔ نئے مراکز خاص طور پر ایسے علاقوں میں قائم کیے جائیں گے جہاں ویکسینیشن کی شرح کم ہے اور بنیادی صحت کی سہولیات تک رسائی محدود ہے۔
پریس ریلیز کے مطابق، پنجاب، پاکستان کے زیر انتظام کشمیر، اور گلگت بلتستان میں پہلے ہی 13 تیار شدہ مراکز کام کر رہے ہیں، جبکہ باقی 13 مراکز کی تعمیر کے لیے سامان کی خریداری کا عمل جاری ہے اور یہ پنجاب اور خیبر پختونخوا میں بنائے جائیں گے۔
یہ مراکز سولر توانائی سے چلنے والے ہوں گے تاکہ بجلی کی بندش یا قدرتی آفات کے دوران بھی خدمات بلا تعطل جاری رہ سکیں۔ اس ماحولیاتی طور پر مستحکم حکمت عملی سے نہ صرف صحت کی خدمات کی تسلسل یقینی بنایا جائے گا بلکہ ماحول کی حفاظت میں بھی مدد ملے گی۔ورلڈ ہیلتھ آرگنائزیشن کے نمائندے برائے پاکستان، ڈاکٹر داپینگ لوؤ نے مساوی صحت کی خدمات کی اہمیت پر زور دیا
ڈاکٹر داپینگ لوؤ نے کہا،
"ہر فرد کو صحت کی سہولیات فراہم کرنا اور کسی کو پیچھے نہ چھوڑنا ہماری بنیادی ذمہ داری ہے۔ یہ مراکز پاکستان میں پرائمری ہیلتھ کیئر کو مضبوط کریں گے اور ہنگامی حالات سے نمٹنے کی صلاحیتوں کو بڑھائیں گے۔”
نئے ویکسینیشن مراکز پاکستان کے صحت عامہ کے نظام میں ایک اہم سنگ میل ہیں، جو ان کمیونٹیز تک زندگی بچانے والی ویکسینز اور ضروری خدمات پہنچائیں گے جو طویل عرصے سے روایتی صحت کے نظام سے باہر رہی ہیں۔
