13ویں بین الاقوامی سیکیورٹی اجلاس 27 سے 29 مئی تک جاری رہے گا
ماسکو میں 27 سے 29 مئی کے دوران منعقد ہونے والی روس کی سالانہ عالمی سیکیورٹی کانفرنس میں دنیا کے 100 سے زائد ممالک کی 125 سے زیادہ وفود شرکت کریں گے۔ روسی سیکیورٹی کونسل کے مطابق، اس تین روزہ اجلاس میں 14 بین الاقوامی تنظیموں کے نمائندے بھی شریک ہوں گے۔
یہ 13واں بین الاقوامی اجلاس برائے اعلیٰ سیکیورٹی نمائندگان ہوگا، جو ’روس‘ نیشنل سینٹر میں سیکیورٹی کونسل کے سیکریٹری سرگئی شوئیگو کی زیرِ صدارت منعقد کیا جائے گا۔
اجلاس کے دوران برکس، آسیان، شنگھائی تعاون تنظیم (SCO)، یوریشین اکنامک یونین (EAEU) اور کامن ویلتھ آف انڈیپنڈنٹ اسٹیٹس (CIS) سمیت مختلف عالمی تنظیموں کے وفود کے درمیان غیر رسمی مذاکرات بھی ہوں گے۔ توقع ہے کہ ان ملاقاتوں میں بین الاقوامی تعاون کو مضبوط بنانے اور ایک "منصفانہ اور جامع سیکیورٹی ڈھانچے” کی تشکیل پر بات چیت ہوگی۔
اس موقع پر پہلی بار سماجی علوم کی بنیاد پر عالمی سیکیورٹی پر ایک خصوصی سیمینار بھی منعقد ہوگا، جسے سیکیورٹی کونسل کے ماہرین پر مشتمل مشاورتی بورڈ نے ترتیب دیا ہے۔
کونسل کے بیان کے مطابق، "بین الاقوامی سیکیورٹی اور قومی خودمختاری سے متعلق کلیدی خارجہ پالیسی فیصلوں کی تشکیل سائنسی بنیادوں پر مبنی تصورات، طریقہ کار، منظرناموں اور پیش گوئیوں پر ہونی چاہیے۔”
روسی حکومت 2010 سے اس سالانہ اجلاس کی میزبانی کر رہی ہے تاکہ عالمی سیکیورٹی، بین الاقوامی تعاون اور دہشت گردی، انتہاپسندی، سرحد پار جرائم، منشیات کی اسمگلنگ اور ابھرتے ہوئے خطرات سے نمٹنے کے لیے مشترکہ حکمت عملی پر تبادلہ خیال کیا جا سکے۔
