درآمدی ٹیکس میں کٹوتی کا فیصلہ

د

معیشت کو عالمی مسابقت کے لیے کھولا جائے گا؛ سخت ٹیکس کمی پر خدشات برقرار

اسلام آباد:
حکومت نے آئندہ بجٹ میں 120 ارب روپے مالیت کے درآمدی ٹیکس میں نمایاں کمی کرنے کا فیصلہ کر لیا ہے، جس کا مقصد ملکی معیشت کو بین الاقوامی مسابقت کے لیے کھولنا ہے، تاہم اس تیز رفتار ٹیرف کٹوتی کے بیرونی مالی توازن پر ممکنہ منفی اثرات پر تشویش پائی جاتی ہے۔

ذرائع کے مطابق وزیرِاعظم شہباز شریف نے اس ہفتے درآمدی ڈیوٹی کم کرنے کے منصوبے کی منظوری دے دی ہے، حالانکہ وزارتِ صنعت و پیداوار اور وزارتِ تجارت نے اس پر اعتراضات اٹھائے تھے۔ دونوں وزارتوں نے مرحلہ وار مگر تیز تر تبدیلیوں کے ملکی صنعتی شعبے اور ادائیگیوں کے توازن پر ممکنہ منفی اثرات سے آگاہ کیا تھا۔

دلچسپ بات یہ ہے کہ ماضی میں ریونیو بڑھانے کے لیے ٹیرف میں اضافے کی حامی وزارتِ خزانہ اور ایف بی آر نے اس منصوبے کی حمایت کی ہے۔ ذرائع کے مطابق اس منصوبے کا پہلا مرحلہ نئے بجٹ میں نافذ کیا جائے گا جبکہ پانچ سال میں مکمل عمل درآمد ہو گا۔

وزیراعظم نے وزارتِ تجارت کی ٹیرف سلیبز کی تعداد پانچ سے بڑھا کر چھ کرنے کی تجویز مسترد کرتے ہوئے فیصلہ کیا کہ نئے منصوبے کے تحت ٹیرف سلیبز کی تعداد کم کر کے چار کر دی جائے گی۔ موجودہ زیادہ سے زیادہ سلیب ریٹ 20 فیصد سے کم کر کے 15 فیصد تک لایا جائے گا۔

ذرائع کے مطابق حکومت کی منظور کردہ آزاد تجارتی منصوبہ بندی، آئی ایم ایف سے طے شدہ منصوبے سے بھی کہیں زیادہ جارحانہ ہے۔ منصوبے کا مجموعی مالی اثر 512 ارب روپے ہوگا، جس میں تیل و گیس کی تلاش و پیداوار سے متعلق کمپنیوں کے ٹیرف میں ممکنہ تبدیلی شامل نہیں۔

پہلے سال میں تقریباً 120 ارب روپے کی آمدنی متاثر ہونے کا اندازہ ہے، جس میں سے 100 ارب روپے صرف ٹیرف سلیبز میں تبدیلی کی وجہ سے ہوں گے۔ نئے بجٹ میں قانونی حیثیت دی جانے والی اس پالیسی کے تحت، کسٹمز ڈیوٹی سلیبز کو چار سطحوں پر تقسیم کیا جائے گا: 0 فیصد، 5 فیصد، 10 فیصد اور 20 فیصد۔ فی الحال پانچ سلیبز موجود ہیں۔

تقریباً 2,201 اشیاء صفر فیصد ڈیوٹی پر درآمد کی جاتی ہیں، لیکن ان پر 2 فیصد اضافی کسٹمز ڈیوٹی اور 20 فیصد تک ریگولیٹری ڈیوٹی لاگو ہے۔ حکومت نے آٹو موبائل سیکٹر کی درآمدی ڈیوٹی میں کوئی تبدیلی نہ کرنے کا فیصلہ کیا ہے۔

3 فیصد ڈیوٹی سلیب میں 972 اشیاء شامل ہیں، جن پر بھی 2 فیصد اضافی ڈیوٹی اور 35 فیصد تک ریگولیٹری ڈیوٹی لاگو ہے۔ یہ سلیب ختم کر کے اشیاء کو یا تو صفر فیصد یا 5 فیصد سلیب میں منتقل کیا جائے گا، اور غالب امکان ہے کہ زیادہ تر اشیاء کو 5 فیصد میں شامل کیا جائے گا، جس سے 70 ارب روپے کی آمدنی حاصل ہو سکتی ہے۔

نئے 5 فیصد ٹیرف سلیب کو متعارف کروایا گیا ہے جبکہ موجودہ 11 فیصد سلیب کو 10 فیصد تک کم کیا جائے گا۔ اس سلیب میں 1,121 اشیاء شامل ہیں، جن پر بھی اضافی 2 فیصد ڈیوٹی اور 50 فیصد تک ریگولیٹری ڈیوٹی عائد ہے۔

چوتھا سلیب فی الحال 16 فیصد کا ہے، جس کے تحت 545 اشیاء کی درآمد ہوتی ہے۔ اس پر 4 فیصد اضافی کسٹمز ڈیوٹی اور 50 فیصد تک ریگولیٹری ڈیوٹی لاگو ہے، جسے نئے بجٹ میں 15 فیصد کر دیا جائے گا۔

پانچواں سلیب، جو 20 فیصد شرح پر مشتمل ہے، بتدریج ختم کیا جائے گا۔ اس سلیب کے تحت 2,227 اشیاء درآمد کی جا سکتی ہیں، جن پر 6 فیصد اضافی کسٹمز ڈیوٹی اور 60 فیصد تک ریگولیٹری ڈیوٹی عائد ہے۔

تاہم، ماہرین کا کہنا ہے کہ اچانک معیشت کو کھولنے سے درآمدی بوجھ میں اضافہ ہو سکتا ہے، جس سے ادائیگیوں کا توازن بگڑنے کا خدشہ ہے۔ وزارتِ خزانہ کا تخمینہ ہے کہ ہر 1 فیصد ڈیوٹی میں کمی سے تجارتی خسارہ 1.7 فیصد تک بڑھ سکتا ہے۔

وزارتِ تجارت نے 0، 3، 6، 9، 12 اور 20 فیصد پر مشتمل چھ سلیبز تجویز کیے تھے لیکن وزیرِاعظم نے اس کی منظوری نہیں دی۔

فیصلے کے مطابق، چار سال میں اضافی کسٹمز ڈیوٹی مکمل ختم کی جائے گی، جبکہ ریگولیٹری ڈیوٹیز کو پانچ سال میں مرحلہ وار ختم کیا جائے گا۔ کسٹمز ایکٹ کے شیڈول فائیو، جو صنعتی خام مال اور سرمایہ جاتی اشیاء کی درآمدات سے متعلق ہے، کو بھی پانچ سال میں مکمل طور پر ختم کر دیا جائے گا۔

ایک اعلیٰ ٹیکس اہلکار کے مطابق، درآمدی ڈیوٹی میں کمی سے ہونے والے نقصان کو ملکی اقتصادی سرگرمیوں سے حاصل ہونے والے ٹیکس سے پورا کیا جائے گا۔ پہلے سال میں 15 ارب روپے کا کسٹمز ڈیوٹی نقصان، 50 ارب روپے اضافی کسٹمز ڈیوٹی، 35 ارب روپے ریگولیٹری ڈیوٹی، اور 20 ارب روپے شیڈول فائیو سے متعلقہ نقصان کا تخمینہ ہے۔

فیصلے کے مطابق، تجارتی وزن کے حساب سے اوسط ٹیرف اگلے مالی سال میں 10.62 فیصد سے کم ہو کر 9.57 فیصد رہ جائے گا، جبکہ اوسط کسٹمز ڈیوٹی 5.68 فیصد سے گھٹ کر 5.54 فیصد ہو جائے گی۔

ذرائع کے مطابق، وزیرِاعظم آفس کا مؤقف ہے کہ بلند ٹیرف ملکی پیداوار کو متاثر کرتے ہیں اور مقامی کمپنیاں برآمدات کی جانب راغب نہیں ہوتیں۔ تاہم، وزارتِ تجارت کے حکام کا کہنا ہے کہ یہ منصوبہ خام مال اور تیار مصنوعات کے درمیان "کاسکیڈنگ اصول” سے متصادم ہے۔

ان کے مطابق، توانائی، مزدوری اور کم پیداواری استعداد کی وجہ سے ٹیرف میں کمی کے باوجود پیداوار کی لاگت میں کوئی نمایاں کمی متوقع نہیں۔

512 ارب روپے کے مجموعی نقصان میں سے تقریباً 300 ارب روپے کا نقصان آئی ایم ایف کے جاری تین سالہ پروگرام کے دوران ہوگا۔

کچھ حکومتی عہدیداروں نے احتیاط برتنے کی ضرورت پر زور دیا، لیکن حکومت نے فیصلہ کیا ہے کہ برآمدات کو فروغ دینے کے لیے درمیانی درجے کے خام مال اور سرمایہ جاتی اشیاء پر ٹیرف میں کمی ناگزیر ہے۔