حویلی: آزاد جموں و کشمیر کے وزیر برائے بلدیات و دیہی ترقی راجہ فیصل ممتاز راٹھور نے جمعرات کو اعلان کیا ہے کہ بھارتی جارحیت سے متاثرہ شہریوں کی مدد کے لیے اے جے کے حکومت نے ایک ارب روپے کا ریلیف فنڈ مختص کر دیا ہے۔
حویلی میں ایک امدادی چیکس تقسیم کرنے کی تقریب سے خطاب کرتے ہوئے راٹھور نے حالیہ پاک-بھارت جھڑپوں میں پاکستان کی مسلح افواج کی "فیصلہ کن کامیابی” کو خراجِ تحسین پیش کیا اور پاکستانی قوم خصوصاً کشمیری عوام کی استقامت اور اتحاد کی تعریف کی۔
انہوں نے کہا کہ یہ جنگ ایک سنجیدہ چیلنج تھی، جس کی اصل شدت وہی لوگ محسوس کر سکتے ہیں جو اس کا براہِ راست نشانہ بنے۔ "پوری قوم، بشمول کشمیری عوام، اس آزمائش میں یکجہتی کے ساتھ کھڑی رہی،” انہوں نے کہا۔
راجہ فیصل راٹھور نے پاکستان کی عسکری کارروائی "آپریشن بنیاں مرصوص” کو ایک بڑی کامیابی قرار دیا، جس نے ان کے مطابق مسئلہ کشمیر کو عالمی سطح پر اجاگر کیا اور مودی حکومت کے تحت بھارتی جارحیت کو بے نقاب کیا۔
انہوں نے شہداء کی قربانیوں کو خراجِ عقیدت پیش کیا اور ان کے لواحقین سے یکجہتی کا اظہار کرتے ہوئے بتایا کہ یہ ایک ارب روپے کا ریلیف پیکیج وزیرِاعظم چوہدری انوارالحق کی قیادت میں ان شہداء و زخمیوں کے اہلِ خانہ کے لیے مختص کیا گیا ہے جو بھارتی شیلنگ کا نشانہ بنے۔
حویلی کہوٹہ میں بھارتی فائرنگ کے دوران مقامی محکمہ جات کی کارکردگی کو سراہتے ہوئے وزیرِ بلدیات نے اسے قابلِ فخر قرار دیا۔
انہوں نے قومی اتحاد کی اہمیت پر زور دیتے ہوئے کہا کہ بھارت کی مسلسل جارحیت کے تناظر میں مکمل تیاری ضروری ہے۔ ان کا کہنا تھا کہ کشمیری عوام طویل عرصے سے اپنے حقِ خودارادیت کے لیے قربانیاں دے رہے ہیں اور اپنی جدوجہد میں ثابت قدم ہیں۔
