بھارتی جارحیت کے دوران 11 فوجی اور 40 شہری شہید، 78 فوجی اور 121 شہری زخمی: آئی ایس پی آر
راولپنڈی: پاک فوج کے شعبہ تعلقات عامہ (آئی ایس پی آر) نے منگل کے روز بتایا کہ بھارتی جارحیت کے نتیجے میں 11 پاکستانی فوجی اور 40 شہری شہید ہو گئے، جبکہ 78 فوجی اور 121 شہری زخمی ہوئے۔
آئی ایس پی آر کے مطابق،
"6 اور 7 مئی 2025 کی درمیانی شب بھارتی مسلح افواج نے بلااشتعال اور قابلِ مذمت بزدلانہ حملے کیے، جن کا ہدف معصوم شہری تھے، جن میں خواتین، بچے اور بزرگ بھی شامل تھے۔”
ان وحشیانہ حملوں کے نتیجے میں 40 شہری شہید ہوئے، جن میں 7 خواتین اور 15 بچے شامل ہیں۔ مزید برآں، 121 شہری زخمی ہوئے جن میں 10 خواتین اور 27 بچے شامل ہیں۔
آئی ایس پی آر کے مطابق، اس سنگین جارحیت کے جواب میں پاکستانی مسلح افواج نے مارکۂ حق کے عنوان سے آپریشن "بنیان مرصوص” کے تحت درست نشانہ بنانے والے مؤثر جوابی حملے کیے۔
بیان میں کہا گیا:
"وطنِ عزیز کا دفاع کرتے ہوئے پاکستان کی مسلح افواج کے 11 بہادر سپاہی شہید ہوئے جبکہ 78 زخمی ہوئے۔”
شہداء کی تفصیلات جاری – بھارت کی جارحیت کے خلاف قوم کا عزم غیر متزلزل: آئی ایس پی آر
راولپنڈی: پاک فوج کے شعبہ تعلقات عامہ (آئی ایس پی آر) کے مطابق بھارتی جارحیت کے دوران پاک فوج اور پاک فضائیہ کے جو 11 جوان شہید ہوئے، ان کی شناخت درج ذیل ہے:
پاک فوج کے شہداء:
- نائیک عبد الرحمٰن
- لانس نائیک دلور خان
- لانس نائیک اکرام اللہ
- نائیک وقار خالد
- سپاہی محمد عدیل اکبر
- سپاہی نثار
پاک فضائیہ کے شہداء:
- سکواڈرن لیڈر عثمان یوسف
- چیف ٹیکنیشن اورنگزیب
- سینئر ٹیکنیشن نجیب
- کارپورل ٹیکنیشن فاروق
- سینئر ٹیکنیشن مبشر
آئی ایس پی آر کے بیان کے مطابق:
"یہ شہداء کی عظیم قربانی، جرات، وفاداری اور غیر متزلزل حب الوطنی کی ایک دائمی علامت ہے، جو قوم کی یادداشت میں ہمیشہ کے لیے نقش ہو چکی ہے۔”
پاک افواج اور پاکستانی عوام شہید فوجی جوانوں اور شہریوں کو خراجِ عقیدت پیش کرتے ہیں، اور زخمیوں کی جلد صحتیابی کے لیے دل کی گہرائیوں سے دعاگو ہیں۔
آئی ایس پی آر نے اپنے بیان میں عزم کا اظہار کرتے ہوئے کہا:
"قوم دشمن کی جارحیت کے خلاف پرعزم ہے۔ کسی کو کوئی غلط فہمی نہ رہے: پاکستان کی خودمختاری یا علاقائی سالمیت کو چیلنج کرنے کی کسی بھی کوشش کا آئندہ بھرپور، مکمل اور فیصلہ کن جواب دیا جائے گا، ان شاء اللہ۔”
