اسلام آباد – پاکستان کے صفِ اول کے ڈیجیٹل مائیکروفنانس ادارے، موبی لنک بینک نے ملک کے سب سے بڑے ای کامرس پلیٹ فارم، دراز پاکستان کے ساتھ شراکت داری کا اعلان کیا ہے۔ اس شراکت داری کا مقصد ملک بھر میں مائیکرو، چھوٹے اور درمیانے درجے کے کاروبار (MSMEs) کے لیے مالی شمولیت، قرض تک رسائی، اور ڈیجیٹل ترقی کو فروغ دینا ہے۔
موبی لنک بینک MSMEs اور خواتین کاروباری افراد کو دراز سے وابستہ ہونے کی صورت میں 25 ہزار سے 30 لاکھ روپے تک کے مخصوص مالیاتی حل فراہم کرے گا۔ دراز MSMEs کو آن لائن مصنوعات فروخت کرنے کے لیے ڈیجیٹل مارکیٹ پلیس فراہم کرے گا، جس سے کاروباری وسعت اور پائیداری کو فروغ ملے گا۔
موبی لنک بینک دراز کے ملازمین اور سپلائرز کے لیے گرین فنانسنگ اسکیمز (جیسے سولر ہوم اور الیکٹرک بائیک قرضے) اور مفت بینکاری خدمات بھی فراہم کرے گا تاکہ پائیدار ترقی اور مالی شمولیت کو مزید تقویت دی جا سکے۔دستخط کی تقریب سے خطاب کرتے ہوئے، موبی لنک بینک کے صدر و سی ای او، حارث محمود چوہدری نے کہا:
"دراز کے ساتھ ہماری شراکت داری MSMEs، خاص طور پر خواتین کی زیر قیادت کاروباروں کے لیے دو اہم ترقیاتی راستے فراہم کرتی ہے: مالیاتی سہولت اور ڈیجیٹل خودمختاری۔ یہ انہیں پائیداری، ترقی اور ملک گیر ای کامرس مواقع تک رسائی حاصل کرنے میں مدد دے گا۔ یہ ہماری مالی شمولیت اور پسماندہ طبقوں کی ترقی سے وابستگی کا مظہر ہے۔”
دراز پاکستان و سری لنکا کے منیجنگ ڈائریکٹر، احسن سایا نے کہا:
"دراز چھوٹے کاروباروں کو بااختیار بنانے، ڈیجیٹل فرق کم کرنے، اور ترقی کے نئے راستے فراہم کرنے کے لیے پُرعزم ہے۔ موبی لنک بینک کے ساتھ یہ شراکت MSMEs، خاص طور پر خواتین کاروباری افراد کو مالی رسائی اور ڈیجیٹل مارکیٹ پلیس کی وسیع رسائی کے امتزاج سے طاقت دے گی۔ ہمارا ہدف ایک ایسا پائیدار کاروباری نظام تشکیل دینا ہے جو پاکستان کی ڈیجیٹل معیشت میں مثبت کردار ادا کرے۔”
شراکت دار ادارے اپنے تعاون کو مزید بڑھانے کے لیے جدید ڈیجیٹل مالیاتی حل متعارف کرانے کا ارادہ رکھتے ہیں، جن میں دراز کی ترسیلات کے لیے QR کوڈ کی بنیاد پر ادائیگی کے اختیارات شامل ہیں، تاکہ اختتامی صارفین کے لیے سہولت اور سیکیورٹی میں اضافہ کیا جا سکے۔ مزید برآں، موبی لنک بینک مقامی شاخوں پر نقد جمع کرانے کی سہولت فراہم کرنے پر غور کر رہا ہے تاکہ دراز کے بیچنے والوں کو اپنے کیش فلو کو منظم کرنے میں مزید لچک مل سکے۔ یہ اقدامات پاکستان کے کاروباری نظام، ڈیجیٹل انضمام، اور جامع اقتصادی مواقع کو مضبوط کرنے کی طرف اہم قدم ہیں۔
