واہگہ بارڈر دو دن کے لیے دوبارہ کھول دیا گیا

و

لاہور:
پاکستان اور بھارت کے درمیان جاری کشیدگی کے باوجود، واہگہ-اٹاری بارڈر کو دو دن کے لیے عارضی طور پر کھول دیا گیا ہے تاکہ طویل مدتی ویزا (LTV) اور "نو آبجیکشن ریٹرن ٹو انڈیا” (NORI) ویزا رکھنے والے شہریوں کو سہولت فراہم کی جا سکے۔سیکیورٹی ذرائع نے تصدیق کی ہے کہ اس اقدام کا مقصد ان افراد کی مدد کرنا ہے جو دونوں ممالک میں رہائش پذیر ہیں اور حالیہ بارڈر بندش کے باعث واپسی میں مشکلات کا سامنا کر رہے تھے۔

پیر کے روز، 129 پاکستانی پاسپورٹ رکھنے والے افراد، جن کے پاس NORI ویزے تھے، واہگہ بارڈر کے ذریعے بھارت میں داخل ہوئے۔تاہم، ذرائع کے مطابق، کوئی بھی بھارتی شہری جو پاکستانی طویل مدتی ویزا رکھتا تھا، پیر کے دن پاکستان نہیں آیا۔بھارتی شہریوں کی پاکستان آمد منگل اور بدھ کو متوقع ہے۔
سفارتی حکام نے وضاحت کی کہ پاکستان بھارتی شہریوں کو، خصوصاً ان خواتین کو جو پاکستانی شہریوں سے شادی کر کے پاکستان میں مستقل طور پر آباد ہو چکی ہیں لیکن ابھی پاکستانی شہریت حاصل نہیں کر سکیں، طویل مدتی ویزا جاری کرتا ہے۔یہ افراد جب بھارت اپنے اہل خانہ سے ملنے یا کسی تقریب میں شرکت کے لیے جاتے ہیں تو واپسی کے لیے انہیں نیا ویزا لینے کی ضرورت نہیں ہوتی۔

اسی طرح، بھارت بھی پاکستانی شہریوں کو طویل مدتی ویزا کے ساتھ NORI سرٹیفکیٹ جاری کرتا ہے تاکہ وہ پاکستان آ کر اپنے اہل خانہ سے مل سکیں اور بعد میں بغیر نیا ویزا حاصل کیے بھارت واپس جا سکیں۔حالیہ کشیدگی کے بعد دونوں ممالک نے واہگہ-اٹاری بارڈر بند کر دیا تھا، جس کی وجہ سے طویل مدتی اور NORI ویزا رکھنے والے افراد اپنے اپنے ممالک میں پھنس کر رہ گئے تھے۔

اگرچہ دونوں حکومتوں نے کاروباری، سیاحتی اور طبی ویزوں پر جاری کردہ اجازت نامے منسوخ کر دیے تھے اور متاثرہ افراد کو مختصر مدت کے لیے واپسی کی اجازت دی تھی، تاہم یہ اجازت ابتدائی طور پر طویل مدتی ویزا رکھنے والوں کے لیے نہیں تھی۔

اس کے نتیجے میں، کئی پاکستانی اور بھارتی شہری گزشتہ چار دنوں سے بارڈر کے دونوں جانب پھنسے ہوئے تھے اور بارڈر عبور کرنے کے لیے کلیئرنس کا انتظار کر رہے تھے۔