اسلام آباد/سرگودھا – پنجاب اور خیبر پختونخوا کے مختلف علاقوں میں سیکیورٹی فورسز کی جانب سے پیر کے روز کیے گئے آپریشنز کے دوران کم از کم 16 دہشت گرد ہلاک ہو گئے۔
سرکاری ذرائع کے مطابق، سرگودھا کے کاؤنٹر ٹیررازم ڈیپارٹمنٹ (سی ٹی ڈی) ریجن نے میانوالی کے علاقے مکڑوال میں کارروائی کے دوران 10 خوارج دہشت گردوں کو ہلاک کر دیا۔ ریجنل پولیس آفس کے مطابق، یہ ہدفی آپریشن ریجنل پولیس آفیسر شہزاد آصف خان اور ضلعی پولیس افسر میانوالی اختر فاروق کی نگرانی میں انجام دیا گیا۔
پنجاب کی وزیر اعلیٰ مریم نواز شریف اور انسپکٹر جنرل پنجاب پولیس ڈاکٹر عثمان انور نے سی ٹی ڈی کے جوانوں کی بہادری کو سراہا۔
ادھر خیبر پختونخوا میں سیکیورٹی فورسز نے دو علیحدہ جھڑپوں کے دوران 6 خوارج دہشت گردوں کو ہلاک کر دیا، جن میں ان کا سرغنہ ذبیح اللہ عرف زکران بھی شامل ہے۔
آئی ایس پی آر کی جانب سے جاری کردہ اعلامیے کے مطابق، "20 تا 21 اپریل 2025 کے دوران خیبر پختونخوا میں دو علیحدہ جھڑپوں میں چھ خوارج واصلِ جہنم کیے گئے۔”
اعلامیے میں مزید کہا گیا کہ شمالی وزیرستان کے علاقے رزمک میں خوارج کی موجودگی کی اطلاع پر انٹیلی جنس معلومات کی بنیاد پر کارروائی کی گئی، جس کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا اور پانچ دہشت گردوں کو ہلاک کر دیا۔
"اسی نوعیت کی ایک اور کارروائی جنوبی وزیرستان میں کی گئی، جس میں سیکیورٹی فورسز نے خوارج کے سرغنہ ذبیح اللہ عرف زکران کو ہلاک کر دیا۔ وہ سیکیورٹی فورسز کے خلاف متعدد دہشت گرد کارروائیوں اور عام شہریوں کے ٹارگٹ کلنگ میں ملوث تھا اور قانون نافذ کرنے والے اداروں کو مطلوب تھا،” اعلامیے میں کہا گیا۔
سیکیورٹی فورسز علاقے میں کسی بھی باقی ماندہ دہشت گرد کی تلاش کے لیے کلیئرنس آپریشن جاری رکھے ہوئے ہیں۔ پاکستان کی سیکیورٹی فورسز ملک سے دہشت گردی کے ناسور کے مکمل خاتمے کے لیے پرعزم ہیں۔
