2024 کے بعد حکومت کی جانب سے گندم کی کم از کم امدادی قیمت پر خریداری بند کرنے کے باعث کسان اپنی پیداوار حکومت کو فروخت نہیں کر سکے، جس کے نتیجے میں گندم کی بڑی مقدار اوپن مارکیٹ میں آگئی اور اس سے قیمتوں میں نمایاں کمی دیکھنے میں آئی۔ اخبار کی ایک رپورٹ کے مطابق، فوڈ اینڈ ایگریکلچر آرگنائزیشن (ایف اے او) نے بتایا کہ مارچ میں آٹے کی خوردہ قیمتوں میں ملا جلا رجحان رہا، تاہم سالانہ بنیاد پر قیمتیں واضح طور پر کم رہیں، جس کی بڑی وجہ 2024 میں ریکارڈ پیداوار کے باعث مارکیٹ میں گندم کی وافر فراہمی ہے۔رپورٹ میں مزید کہا گیا کہ مارچ 2025 میں عالمی سطح پر گندم کی برآمدی قیمتوں میں بھی کمی واقع ہوئی، جیسا کہ مکئی کی قیمتوں کے ساتھ ہوا۔ بڑھتے ہوئے عالمی تجارتی تناؤ اور اس سے جڑی غیر یقینی صورتحال نے مارکیٹ پر منفی اثر ڈالا، جبکہ چین سے درآمدی طلب میں بھی کمی دیکھی گئی۔امریکہ میں فصل کی بہتر ہوتی ہوئی صورتحال بھی امریکی بینچ مارک قیمتوں میں 3 فیصد کمی کا سبب بنی۔ رپورٹ میں بتایا گیا کہ شمالی امریکہ میں قیمتوں میں کمی نے ایشیائی منڈیوں میں آسٹریلوی قیمتوں پر بھی منفی اثر ڈالا، جہاں مارچ میں ان میں 3 فیصد کی گراوٹ دیکھی گئی۔ اناج کی عالمی قیمتوں میں اس کمی کی بنیادی وجوہات میں جنوبی نصف کرہ میں فصلوں کی رسد میں اضافہ، عالمی درآمدی طلب میں کمی، اور چند بڑے برآمد کنندگان کی جانب سے فصلوں کے بارے میں خدشات شامل ہیں۔
