لبنانی حکام نے ڈزنی کی نئی لائیو ایکشن فلم سنو وائٹ کی نمائش پر پابندی عائد کر دی ہے۔ اس فیصلے کی وجہ اسرائیلی اداکارہ گیل گڈوٹ کی کاسٹنگ بتائی گئی ہے، جو اسرائیلی فوج (IOF) کی سابق اہلکار اور فلسطینیوں کے خلاف جاری جارحیت کے دوران "اسرائیل” کی کھلم کھلا حمایتی ہیں۔
لبنانی وزارتِ داخلہ کی جانب سے پیر کے روز جاری کردہ بیان میں کہا گیا کہ وزیر داخلہ احمد حجار نے 11 اپریل کو ایک حکم نامے پر دستخط کیے، جس کے تحت ملک بھر میں فلم پر پابندی عائد کی گئی۔ یہ فیصلہ جنرل سیکیورٹی کے میڈیا سینسرشپ کمیشن کی سفارش پر کیا گیا۔ گیل گڈوٹ لبنان کی باضابطہ "بائیکاٹ لسٹ” میں شامل ہیں، جس کی وجہ ان کی اسرائیلی شہریت اور فوجی خدمات ہیں۔
اسی نوعیت کے ایک اقدام میں کویت کے مقامی ذرائع ابلاغ نے اطلاع دی ہے کہ ملک کی بڑی سنیما چینز نے عوامی دباؤ کے باعث سنو وائٹ کی نمائش منسوخ کر دی ہے۔ رپورٹ کے مطابق، کویت میں عوامی غم و غصے اور اسرائیل کے ساتھ تعلقات معمول پر لانے کے خلاف سخت مؤقف کے پیشِ نظر یہ اقدام کیا گیا۔
پہلا واقعہ نہیں
لبنان کی جانب سے گیل گڈوٹ کی فلم پر پابندی کا یہ تیسرا موقع ہے۔ اس سے قبل ونڈر وومن (2017) اور ڈیتھ آن دی نیل (2022) کی نمائش بھی ممنوع قرار دی جا چکی ہے۔
لبنانی قانون کے تحت اسرائیلیوں سے کسی بھی قسم کا ثقافتی، تجارتی یا ذاتی رابطہ ممنوع ہے، اور اسے غداری یا جاسوسی جیسے جرائم کے زمرے میں شمار کیا جاتا ہے، جن کی سزا قید یا حتیٰ کہ سزائے موت بھی ہو سکتی ہے۔ "اسرائیل” کا سفر بھی قانونی طور پر ممنوع ہے۔ یہ ضوابط لبنانی فوجداری ضابطہ، 1955 کے بائیکاٹ قانون، اور فوجی عدالتی ڈھانچے میں واضح طور پر درج ہیں۔
دوسری جانب، کیپٹن امریکہ: بریو نیو ورلڈ نامی فلم بھی تنقید کی زد میں ہے، جس میں اسرائیلی اداکارہ شیرا ہاس شامل ہیں۔ یہ فلم اس وقت لبنان میں نمائش پذیر ہے، جس پر بائیکاٹ مہم چلانے والے حلقے تنقید کر رہے ہیں۔ اگرچہ شیرا ہاس لبنان کی بلیک لسٹ میں شامل نہیں، لیکن وہ فلم میں "سابرا” نامی کردار ادا کر رہی ہیں، جو کہ مارول کامکس میں ایک اسرائیلی موساد ایجنٹ کے طور پر متعارف کرایا گیا تھا۔ فلم میں اس کردار کو امریکی ایجنٹ کے طور پر دکھایا گیا ہے تاکہ اسرائیلی پالیسیوں کی حمایت کے تاثر کو ختم کیا جا سکے۔
"سابرا” کا نام بھی لبنان میں ایک المناک تاریخی یاد کو تازہ کرتا ہے—1982 میں صابرا اور شتیلا کیمپوں میں فلسطینی پناہ گزینوں کا قتلِ عام، جو دائیں بازو کی لبنانی ملیشیا نے اسرائیلی فوج کی معاونت سے کیا تھا۔
وزارتِ داخلہ کے بیان میں کہا گیا ہے کہ کیپٹن امریکہ کی نمائش قومی سلامتی سے متعلق مشاورت کے بعد منظور کی گئی اور اس میں شامل اداکارہ بلیک لسٹ میں شامل نہیں ہیں۔
سنو وائٹ میں گیل گڈوٹ نے ایول کوئین کا کردار ادا کیا ہے۔ یہ فلم 20 مارچ کو متحدہ عرب امارات میں ریلیز ہوئی تھی اور 17 اپریل تک مصر، سعودی عرب، قطر اور اردن میں سنیما گھروں میں پیش کیے جانے کا امکان ہے۔ مصری فلم ڈسٹریبیوٹر محمود الدفراوی نے تصدیق کی ہے کہ فلم بدھ کے روز مصر میں نمائش کے لیے پیش کی جا رہی ہے۔
یہ فلم 21 مارچ کو امریکہ میں ریلیز ہوئی، تاہم باکس آفس پر خاطر خواہ کامیابی حاصل نہ کر سکی۔ فلم کی مرکزی اداکارہ ریچل زیگلر نے بھی فلسطینی عوام کی حمایت میں آواز بلند کی ہے۔ اگست میں انہوں نے سوشل میڈیا پلیٹ فارم X پر کہا تھا: "ہمیشہ یاد رکھیں، فری فلسطین۔”
ادھر اسرائیلی فضائی حملے لبنان میں بدستور جاری ہیں۔ اقوام متحدہ کے دفتر برائے انسانی حقوق کے مطابق، 15 اپریل تک لبنان میں کم از کم 71 شہری ہلاک ہو چکے ہیں جبکہ "اسرائیل” روزانہ کی بنیاد پر نومبر 2024 میں طے پانے والے امریکی ثالثی والے جنگ بندی معاہدے کی خلاف ورزی کر رہا ہے۔
یہ جارحیت 8 اکتوبر 2023 کو شروع ہوئی تھی، اور اب تک لبنان میں 4,000 سے زائد افراد جان سے ہاتھ دھو بیٹھے ہیں۔
