لاہور: وفاقی وزیر خزانہ سینیٹر محمد اورنگزیب نے کہا ہے کہ حکومت کا بنیادی مقصد عام آدمی کو فائدہ پہنچانا ہے، لیکن اگر مہنگائی میں کمی کے اعداد و شمار کا فائدہ عوام تک نہیں پہنچتا تو اس کا کوئی فائدہ نہیں۔لاہور چیمبر آف کامرس اینڈ انڈسٹری (ایل سی سی آئی) سے خطاب کرتے ہوئے وزیر خزانہ نے کہا کہ مہنگائی میں کمی آ رہی ہے اور شرح سود 22 فیصد سے کم ہو کر 12 فیصد ہو چکی ہے۔ انہوں نے کہا، "ہم پُرعزم ہیں کہ مہنگائی میں کمی کے ثمرات عام آدمی تک پہنچیں۔ اگر یہ فوائد عوام تک نہ پہنچیں تو ان کا کوئی فائدہ نہیں۔ مالی استحکام کے لیے مہنگائی میں کمی ضروری ہےانہوں نے مزید کہا کہ حکومت ہر ہفتے اشیائے خوردونوش کی قیمتوں کا جائزہ لے رہی ہے، لیکن عالمی منڈی میں قیمتیں کم ہونے کے باوجود یہاں قیمتیں بڑھ رہی ہیں۔ "ہم صوبائی حکومتوں اور مقامی انتظامیہ کے تعاون سے قیمتیں کم کرنے کی کوشش کریں گے۔ مڈل مین (بیوپاری) کو نظام کا ناجائز فائدہ اٹھانے کی اجازت نہیں دی جائے گی،” انہوں نے واضح کیا۔وزیر خزانہ نے انفارمیشن ٹیکنالوجی (آئی ٹی) اور معدنیات کے شعبوں کو پاکستان کی اقتصادی تبدیلی کے لیے کلیدی قرار دیتے ہوئے انہیں "گیم چینجرز” قرار دیا۔انہوں نے کہا کہ وزیراعظم شہباز شریف کی قیادت میں حکومت ایک واضح اور ہدف پر مبنی معاشی حکمتِ عملی پر گامزن ہے، جس کے مثبت نتائج جلد سامنے آئیں گے۔انہوں نے کہا کہ حکومت ان اہم شعبوں میں مقامی و غیر ملکی سرمایہ کاری کی راہ میں حائل تمام رکاوٹوں کو دور کرنے پر کام کر رہی ہے۔ کاروباری برادری کو یقین دلاتے ہوئے انہوں نے کہا،ہم عوام کے خادم ہیں، اور میں یہاں آپ کی بات سننے، سمجھنے اور مسائل کے حل کے لیے آیا ہوںانہوں نے مزید زور دیا کہ پائیدار صنعتی ترقی کے لیے فنانسنگ کی لاگت میں کمی، بجلی کے نرخوں میں کمی اور ٹیکسیشن کے نظام میں اصلاحات ضروری ہیں۔اورنگزیب نے بتایا کہ غیر ملکی سرمایہ کاروں کی جانب سے منافع کی ترسیل (profit repatriation) سے متعلق دیرینہ مسائل حل کر دیے گئے ہیں، جس سے پاکستان کی معیشت پر بین الاقوامی اعتماد میں اضافہ ہوا ہے۔ٹیکسیشن سے متعلق بات کرتے ہوئے انہوں نے تسلیم کیا کہ تنخواہ دار طبقہ منبع پر انکم ٹیکس کی کٹوتی کے باعث دباؤ میں ہے۔ انہوں نے کہا کہ حکومت اس طبقے کو ریلیف فراہم کرنے پر کام کر رہی ہے۔
انہوں نے بتایا کہ 24 سرکاری اداروں کی نجکاری کا فیصلہ کر لیا گیا ہے تاکہ ان کی کارکردگی بہتر بنائی جا سکے اور مالی بوجھ کم کیا جا سکے۔وزیر خزانہ نے سرکاری نظام میں انسانی مداخلت کم کرنے کی اہمیت پر زور دیا تاکہ نظامی بدانتظامیوں کو ختم کیا جا سکے۔ ان کا کہنا تھا،”اگر ہم ٹیکس ٹو جی ڈی پی شرح کو 13 فیصد تک لے آئیں، تو ہم مختلف شعبوں میں وسیع ریلیف دینے کی پوزیشن میں ہوں گے۔”
ایل سی سی آئی کے صدر میاں ابوزر شاد نے حکومت کے حالیہ معاشی اقدامات کو سراہا، جن میں مہنگائی پر قابو پانے اور شرح سود کم کرنے کی کوششیں شامل ہیں۔ انہوں نے “اُڑان پاکستان” پروگرام کی تعریف کی، جس کا مقصد اقتصادی ترقی کی رفتار تیز کرنا، برآمدات کو 60 ارب ڈالر تک لے جانا، ہر سال 10 ارب ڈالر کی نجی سرمایہ کاری لانا اور سالانہ 10 لاکھ روزگار کے مواقع پیدا کرنا ہے۔انہوں نے اسپیشل انویسٹمنٹ فسیلیٹیشن کونسل (SIFC) کے کردار کو بھی سراہا، جو سرمایہ کاروں کا اعتماد بڑھانے اور سازگار کاروباری ماحول فراہم کرنے میں مددگار ہے۔سوال و جواب کے سیشن کے دوران وزیر خزانہ نے بتایا کہ ویزہ کا مسئلہ وزیراعظم کے ہر بیرون ملک دورے کے دوران زیرِ بحث آتا ہے، اور اسے ترجیحی بنیادوں پر حل کیا جا رہا ہے۔اورنگزیب نے مزید کہا کہ حکومت نجی شعبے سے مسلسل مشاورت جاری رکھے گی، کیونکہ کسی بھی ملک کو چلانے میں نجی شعبہ کلیدی کردار ادا کرتا ہے۔ انہوں نے بتایا کہ وزیراعظم کی ہدایت پر ایک کمیٹی تشکیل دی گئی ہے جو جی ایس پی پلس (GSP Plus) پر کام کر رہی ہے۔
اگر مہنگائی میں کمی کے فوائد عام آدمی تک نہ پہنچیں تو اس کا کوئی فائدہ نہیں: اورنگزیبا
