اسلام آباد – تین رکنی امریکی کانگریسی وفد، جس کی قیادت ڈیموکریٹ ٹام سوازی کر رہے ہیں، ہفتہ کے روز ایک ہفتے کے دورے پر پاکستان پہنچا۔ اس وفد میں کانگریس کے اراکین جیک برگ مین، ٹام سوازی اور جوناتھن جیکسن شامل ہیں، جو پاکستان کی اعلیٰ سیاسی و عسکری قیادت سے ملاقات کریں گے۔یہ وفد 20 جنوری کو صدر ٹرمپ کے عہدہ سنبھالنے کے بعد پاکستان کا دورہ کرنے والا پہلا اعلیٰ سطحی امریکی کانگریسی وفد ہےوفد آزاد جموں و کشمیر کے دارالحکومت مظفرآباد کا دورہ بھی کرے گا، جہاں وہ وزیر اعظم انوار الحق چوہدری اور صدر سلطان محمود چوہدری سے ملاقات کرے گا۔ اس موقع پر انہیں مقبوضہ کشمیر کی تازہ ترین صورتحال، خصوصاً لائن آف کنٹرول پر سیکیورٹی کے حالات پر تفصیلی بریفنگ دی جائے گی۔امریکی وفد لاہور کا بھی دورہ کرے گا، جہاں ان کی ملاقات وزیر اعلیٰ پنجاب مریم نواز سے متوقع ہے۔ ملاقات میں باہمی دلچسپی کے امور، اقتصادی تعاون اور پنجاب میں سرمایہ کاری کے مواقع پر بات چیت کی جائے گی۔کانگریسی وفد کرتارپور راہداری کا دورہ بھی کرے گا، جہاں وہ بابا گرو نانک کے مزار پر حاضری دیں گےنیویارک سے "دی نیشن” سے گفتگو کرتے ہوئے پاکستانی نژاد امریکی سیاستدان اور دورے کے کوآرڈینیٹر جناب عمران اقرار نے کہا کہ اس کانگریسی وفد کے دورے کا مقصد پاکستان اور امریکہ کے درمیان دوطرفہ تعلقات کو بہتر بنانا اور پاکستان کے بارے میں مزید بہتر فہم حاصل کرنا ہے۔عمران اقرار نے بتایا کہ اس دورے کے دوران معیشت، تجارت، دفاعی اور عسکری تعلقات، اور تعلیم سمیت دیگر اہم امور بھی ایجنڈے میں شامل ہیں۔ انہوں نے کہا کہ کانگریس مین ٹام سوازی کا یہ پاکستان کا چوتھا دورہ ہے، جبکہ وفد کے دیگر ارکان پہلی مرتبہ پاکستان کا دورہ کر رہے ہیں۔
ہفتے کے روز کانگریسی وفد نے دفتر خارجہ میں سیکریٹری خارجہ آمنہ بلوچ سے ملاقات کی۔ دونوں فریقین نے باہمی دلچسپی کے شعبوں میں دوطرفہ تعلقات کو مزید مضبوط اور متنوع بنانے کے عزم کا اظہار کیا۔
