کراچی / بہاولپور:
محکمہ موسمیات پاکستان (پی ایم ڈی) نے جمعہ کے روز ملک بھر میں ہیٹ ویو کی پیشگوئی کرتے ہوئے 13 سے 18 اپریل کے دوران درجہ حرارت میں غیر معمولی اضافے کا خدشہ ظاہر کیا ہے، جو خاص طور پر سندھ، بلوچستان اور جنوبی پنجاب کو متاثر کرے گا۔
محکمہ موسمیات کے مطابق، موجودہ فضائی دباؤ کے باعث گرمی کی ایک نئی شدید لہر ملک کے بیشتر حصوں کو اپنی لپیٹ میں لے سکتی ہے۔ 13 اپریل سے درجہ حرارت میں اضافہ شروع ہوگا، جو 14 اپریل تک مکمل ہیٹ ویو کی شکل اختیار کرسکتا ہے۔
ایڈوائزری میں کہا گیا ہے کہ یہ ہیٹ ویو 18 اپریل تک جاری رہنے کا امکان ہے، جس دوران دن کے اوقات میں درجہ حرارت معمول سے 6 سے 8 ڈگری سینٹی گریڈ زیادہ ہو سکتا ہے۔ محکمے نے خبردار کیا ہے کہ شدید گرمی کے باعث گرد آلود طوفان اور تیز ہوائیں چلنے کا بھی خطرہ ہے۔ شہریوں، بالخصوص بچوں، بزرگوں اور خواتین کو ہدایت کی گئی ہے کہ وہ دن کے وقت براہ راست دھوپ سے بچیں اور خود کو ہائیڈریٹ رکھیں۔
مزید برآں، تیز ہواؤں اور گرمی کے سبب بجلی کے کھمبوں، درختوں اور سولر پینلز کو نقصان پہنچنے کا خدشہ بھی ظاہر کیا گیا ہے۔
دوسری جانب، ممکنہ خشک سالی کے پیش نظر وزیراعلیٰ پنجاب مریم نواز کی ہدایت پر صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے پیشگی اقدامات شروع کر دیے ہیں۔
اس سلسلے میں بہاولپور میں کمشنر آفس میں ایک اعلیٰ سطحی اجلاس منعقد ہوا، جس کی صدارت پی ڈی ایم اے کے ڈائریکٹر جنرل عرفان علی کاٹھیا اور کمشنر بہاولپور مسرت جبین نے کی۔ اجلاس میں ڈپٹی کمشنرز اور چولستان ڈویلپمنٹ اتھارٹی کے منیجنگ ڈائریکٹر بھی شریک ہوئے۔
اجلاس میں چولستان میں پانی کی فراہمی اور ممکنہ خشک سالی سے نمٹنے کے اقدامات کا جائزہ لیا گیا۔ چولستان اتھارٹی کے ایم ڈی نے علاقے میں پانی کی دستیابی اور خشک سالی کے خطرے سے متعلق بریفنگ دی۔
ڈی جی پی ڈی ایم اے عرفان کاٹھیا نے بتایا کہ صورتحال کے پیش نظر اتھارٹی نے چولستان کے لیے 2,000 جیری کین اور 10 واٹر باؤزر فراہم کیے ہیں۔ ان میں سے 4 باؤزر 12,500 لیٹر جبکہ باقی 6 باؤزر 5,000 لیٹر پانی ذخیرہ کرنے کی صلاحیت رکھتے ہیں۔ شدید دھوپ سے بچاؤ کے لیے متاثرہ علاقوں میں چھتریوں کی تقسیم بھی جاری ہے۔
انہوں نے تمام ڈپٹی کمشنرز کو ہائی الرٹ رہنے کی ہدایت کرتے ہوئے کہا کہ کسی بھی قسم کی غفلت کی گنجائش نہیں ہے۔ اجلاس میں محکمہ صحت، تعلیم، لائیوسٹاک، آبپاشی، زراعت، بلدیات اور دیگر متعلقہ اداروں کے افسران نے شرکت کی۔ ان تمام اداروں کو باہمی رابطے کے ساتھ ممکنہ ہنگامی صورتحال سے نمٹنے کے لیے تیار رہنے کی ہدایت کی گئی۔
ڈی جی پی ڈی ایم اے نے عوام میں آگاہی کے لیے پمفلٹس بھی تقسیم کیے اور پنجاب حکومت کی جانب سے کی گئی تیاریوں پر روشنی ڈالی۔ میڈیا سے گفتگو میں انہوں نے کہا کہ وزیراعلیٰ کی ہدایات کے مطابق تمام ضروری انتظامات مکمل کر لیے گئے ہیں اور عوام کو احتیاطی تدابیر پر سختی سے عمل کرنے کی اپیل کی گئی ہے۔
انہوں نے مزید کہا کہ متعلقہ ادارے باہمی تعاون سے خشک سالی کے خطرے سے مؤثر طور پر نمٹ سکتے ہیں اور عوام سے پانی کے غیر ضروری استعمال سے گریز کی اپیل کی۔
ادھر، شدید گرمی اور خشک سالی سے بچاؤ کے لیے عوامی آگاہی مہمات بھی شروع کر دی گئی ہیں تاکہ شہریوں کو احتیاطی تدابیر سے متعلق آگاہ کیا جا سکے۔
