بیروت: لبنانی صدر جوزف عون نے Baabda کے صدارتی محل میں مشرق وسطیٰ کے لیے امریکی نائب خصوصی ایلچی مورگن اورٹیگس کا خیرمقدم کیا، جہاں دونوں رہنماؤں کے درمیان لبنان کی جنوبی اور شامی سرحدوں سمیت دیگر اہم امور پر اعلیٰ سطحی مذاکرات ہوئے۔
امریکی وفد میں نائب معاون وزیر خارجہ برائے امورِ مشرقِ قریب و شام نتاشا فرانسسکا اور لبنان میں امریکی سفیر لیزا جانسن بھی شامل تھیں۔
لبنانی ایوانِ صدر سے جاری بیان کے مطابق، ملاقات میں جنوبی لبنان کی صورت حال، بین الاقوامی مانیٹرنگ کمیٹی کا کردار، اسرائیلی انخلا اور جنوبی خطے میں حالیہ پیش رفت جیسے اہم موضوعات پر تبادلہ خیال کیا گیا۔
دونوں فریقین نے لبنانی-شامی سرحدی معاملات، دوطرفہ تعاون، مالی اور اقتصادی اصلاحات اور کرپشن کے خلاف حکومتی اقدامات پر بھی گفتگو کی۔
بیان میں کہا گیا کہ ملاقات خوشگوار اور تعمیری ماحول میں ہوئی، جب کہ صدر عون اور امریکی ایلچی کے درمیان تقریباً 30 منٹ کی نجی ملاقات بھی ہوئی۔
المیادین کے نمائندے کے مطابق، ملاقات میں لبنان کی شمالی و مشرقی شامی سرحدوں اور مقبوضہ فلسطین سے ملحقہ جنوبی سرحد کی صورتِ حال پر بھی تفصیلی بات چیت ہوئی۔
صدر عون نے واضح کیا کہ زمینی سرحدوں پر مذاکرات اپنے سابقہ طریقۂ کار کے مطابق جاری رہیں گے، اور ایلچی کی پیش کردہ تجاویز کو مطالبات کے بجائے بات چیت کا حصہ سمجھا گیا۔ انہوں نے مزید کہا کہ لبنانی فوج اپنی ذمہ داریاں بخوبی ادا کر رہی ہے اور جنگ بندی کی نگرانی کرنے والی کمیٹی، جس میں امریکہ بھی شامل ہے، کے ساتھ مربوط رابطے میں ہے۔
ملاقات کے بعد مورگن اورٹیگس نے میڈیا سے کوئی بات چیت نہیں کی اور Baabda محل سے روانہ ہو گئیں۔ وہ لبنانی وزیرِ اعظم اور اسپیکرِ پارلیمنٹ نبیہ بری سے بھی ملاقات کرنے والی ہیں۔
یہ ملاقات ایک ایسے وقت میں ہوئی ہے جب لبنان میں جنگ بندی کی خلاف ورزیاں بڑھتی جا رہی ہیں۔ حالیہ واقعے میں 4 اپریل 2025 کو جنوبی شہر صیدا میں اسرائیلی حملے کے نتیجے میں تین افراد جاں بحق ہوئے، جس سے خطے میں مزید کشیدگی اور ممکنہ جانی نقصان کے خدشات بڑھ گئے ہیں۔
واضح رہے کہ اسرائیلی قابض افواج 27 نومبر 2024 سے لبنان کے ساتھ جنگ بندی معاہدے کی خلاف ورزیوں میں مسلسل ملوث ہیں، جن کی تعداد 2,000 سے تجاوز کر چکی ہے۔ ان خلاف ورزیوں میں جنوبی علاقوں، وادی بقاع اور جنوبی بیروت پر حملے شامل ہیں۔
