یمنی مسلح افواج نے حالیہ امریکی جارحیت کے جواب میں ایک ہم آہنگ اور منظم فوجی کارروائی کے دوران بحیرہ احمر کے شمالی حصے میں امریکی طیارہ بردار جنگی جہاز "یو ایس ایس ہیری ٹرومین” اور اس کے ہمراہ دیگر بحری جنگی یونٹس کو نشانہ بنایا۔
یمنی مسلح افواج کے ترجمان بریگیڈیئر جنرل یحییٰ سریع نے بدھ کے روز ایک باضابطہ بیان میں کہا کہ یہ کارروائی یمن پر کیے گئے 36 امریکی فضائی حملوں کے ردِ عمل میں انجام دی گئی، جن میں دارالحکومت صنعاء، صعدہ اور دیگر صوبے نشانہ بنے۔ ان حملوں کے نتیجے میں کئی شہری جاں بحق اور زخمی ہوئے۔
ترجمان کے مطابق، یمنی بحری، فضائی اور میزائل فورسز نے مربوط انداز میں کروز میزائلوں اور ڈرونز کے ذریعے کارروائی کرتے ہوئے اپنے اہداف کامیابی سے حاصل کیے۔ یہ آپریشن کئی گھنٹوں تک جاری رہا اور اس نے دشمن کی جارحیت کے ایک حصے کو مؤثر طور پر ناکام بنایا۔
بریگیڈیئر جنرل سریع نے واضح کیا کہ یمنی افواج خطے میں موجود تمام امریکی بحری جنگی اثاثوں اور ہر ممکن خطرے کو اپنے دائرہ کار میں رہتے ہوئے نشانہ بناتی رہیں گی۔ ان کا کہنا تھا کہ امریکی حملے فلسطینی عوام کی حمایت کے عزم سے یمن کو پیچھے نہیں ہٹا سکتے۔
انہوں نے مزید کہا کہ یمن کی جانب سے مقبوضہ فلسطین میں اسرائیلی اہداف پر حملے بدستور جاری رہیں گے اور یہ اُس وقت تک نہیں رکیں گے جب تک غزہ پر حملے بند اور محاصرہ مکمل طور پر ختم نہیں ہو جاتا۔
یمن پر امریکی جارحیت میں شدت
جمعرات کے روز امریکی قیادت میں قائم اتحاد کی فضائیہ نے صعدہ کے ضلع مجز میں ایک شہری گاڑی کو نشانہ بنایا، جب کہ اس سے قبل اسی علاقے میں دو فضائی حملے کیے گئے تھے۔
بدھ اور جمعرات کی درمیانی شب امریکی لڑاکا طیاروں نے صعدہ کے مشرقی علاقوں کِتاف اور کہلان پر بھی بمباری کی۔
المیادین کے نمائندے کے مطابق، امریکی فضائیہ نے وسطی یمن کے صوبہ إب میں واقع ضلع جبلہ کے علاقے جبل نامہ میں مواصلاتی نظام کو بھی تباہ کیا۔ اس کے علاوہ جنوبی یمن کے شہر تعز میں بھی حملوں کی اطلاعات موصول ہوئی ہیں۔
یمنی وزارت صحت کے ترجمان انیس الاصبحی نے المیادین کو دیے گئے بیان میں بتایا کہ ان حملوں میں پانچ شہری جاں بحق، پانچ زخمی اور ایک شخص لاپتا ہے۔ ان کا کہنا تھا کہ یمنی عوام اپنی مشکلات سے بخوبی آگاہ ہیں اور ہر چیلنج کا سامنا کرنے کے لیے تیار ہیں۔
یمنی افواج نے امریکی MQ-9 ڈرون مار گرایا
یمنی مسلح افواج نے جمعرات کے روز اعلان کیا کہ انہوں نے صوبہ الحدیدہ کی فضائی حدود میں امریکی ساختہ MQ-9 ڈرون کو اُس وقت مار گرایا جب وہ جاسوسی اور حملہ آور مشن انجام دے رہا تھا۔
ترجمان کے مطابق، پچھلے 72 گھنٹوں کے دوران یہ دوسرا امریکی ڈرون ہے جسے یمنی فضائی دفاعی نظام نے مار گرایا، اور اس طرح "وعدۂ فتح اور مقدس جہاد” کے دوران امریکی ڈرونز کو گرانے کی کل تعداد 17 ہو چکی ہے۔
یاد رہے کہ یمنی فوج کی کارروائیاں امریکہ کی مسلسل جارحیت کے باوجود جاری ہیں، جن کا آغاز یمن کی جانب سے بحری راستوں اور مقبوضہ فلسطینی علاقوں میں دوبارہ عسکری سرگرمیوں کے بعد ہوا۔ یہ ردعمل اسرائیل کی جانب سے غزہ پر تازہ حملوں کے تناظر میں سامنے آیا ہے۔
انصار اللہ تحریک کے رہنما، سید عبدالملک الحوثی نے واضح الفاظ میں کہا ہے کہ بیرونی جارحیت یمن کو اپنے بحری اور میزائل آپریشنز سے باز نہیں رکھ سکتی، اور اسرائیلی اہداف پر حملے اس وقت تک جاری رہیں گے جب تک غزہ پر حملے رُک نہیں جاتے۔
