گزشتہ روز استحکام کے بعد آج سونے کی قیمت میں ایک بار پھر نمایاں اضافہ دیکھنے میں آیا، جس سے نرخ نئی بلند ترین سطح پر پہنچ گئے۔
سرکاری خبر رساں ادارے ‘اے پی پی’ کے مطابق آل پاکستان صرافہ جیمز اینڈ جیولرز ایسوسی ایشن نے رپورٹ کیا ہے کہ 24 قیراط فی تولہ خالص سونے کی قیمت 3,200 روپے کے اضافے کے ساتھ 3 لاکھ 21 ہزار روپے تک جا پہنچی ہے۔
اسی طرح 24 قیراط 10 گرام سونے کی قیمت میں 2,743 روپے کا اضافہ ریکارڈ کیا گیا، جس کے بعد اس کا نیا نرخ 2 لاکھ 75 ہزار 205 روپے ہو گیا، جبکہ 22 قیراط سونا 2,515 روپے مہنگا ہو کر 2 لاکھ 52 ہزار 280 روپے میں دستیاب ہے۔
چاندی کی قیمت میں بھی اضافہ دیکھنے میں آیا، جہاں فی تولہ چاندی 105 روپے اضافے کے ساتھ 3,580 روپے جبکہ 10 گرام چاندی 90 روپے بڑھ کر 3,069 روپے پر پہنچ گئی۔
عالمی مارکیٹ میں بھی سونے کی قیمت میں نمایاں اضافہ ہوا، جہاں فی اونس سونا 31 ڈالر مہنگا ہو کر 3,052 ڈالر تک پہنچ گیا۔
یہ امر قابل ذکر ہے کہ 20 مارچ کو بھی سونے کی قیمت میں تیزی دیکھی گئی تھی، جب فی تولہ نرخ 1,800 روپے اضافے کے بعد 3 لاکھ 20 ہزار 800 روپے کی نئی بلند ترین سطح پر پہنچ گئے تھے۔ اس سے ایک روز قبل، 19 مارچ کو، فی تولہ قیمت 1,650 روپے اضافے کے ساتھ 3 لاکھ 19 ہزار روپے تک جا پہنچی تھی۔
گزشتہ روز (26 مارچ) سونے کی قیمتوں میں استحکام دیکھا گیا تھا، تاہم 25 مارچ کو 24 قیراط فی تولہ خالص سونا 800 روپے کمی کے بعد 3 لاکھ 17 ہزار 800 روپے پر آ گیا تھا۔
