کوئٹہ: جمعیت علمائے اسلام (ف) کے سابق رہنما حافظ حسین احمد انتقال کر گئے
کوئٹہ – جمعیت علمائے اسلام (ف) کے سابق رہنما حافظ حسین احمد بدھ کے روز طویل علالت کے بعد انتقال کر گئے، ان کے بیٹے منیر احمد نے تصدیق کی۔ ان کی عمر 74 برس تھی۔ حافظ حسین احمد گردوں کے مرض میں مبتلا تھے۔سینئر جے یو آئی (ف) رہنما 1951 میں کوئٹہ میں پیدا ہوئے۔ وہ دو مرتبہ قومی اسمبلی کے رکن رہے، پہلی مدت 1988 سے 1990 تک اور دوسری 2002 سے 2007 تک رہی۔ اس کے علاوہ وہ مارچ 1991 سے مارچ 1994 تک سینیٹ آف پاکستان کے رکن بھی رہے۔حافظ حسین احمد نے اپنی زندگی دینی تعلیم اور قومی سیاست کے لیے وقف کر دی۔ ان کی ابتدائی تعلیم عربی، اسلامی ادب، قرآن، حدیث اور فقہ پر مشتمل تھی۔ انہوں نے درسِ نظامی مکمل کرنے کے ساتھ ساتھ حفظِ قرآن کی سند بھی حاصل کی۔انہوں نے 1973 میں بلوچستان سے اپنے سیاسی سفر کا آغاز کیا، پہلے صوبائی سطح پر متحرک رہے اور بعد ازاں قومی سیاست میں نمایاں کردار ادا کیا۔ وہ جمعیت علمائے اسلام (جے یو آئی) اور پاکستان نیشنل الائنس (پی این اے) میں اہم عہدوں پر فائز رہے۔ قومی اسمبلی میں ڈپٹی پارلیمانی لیڈر کے طور پر بھی خدمات انجام دیں اور قانون سازی کے امور میں نمایاں کردار ادا کیا۔
حافظ حسین احمد نے جمعیت علمائے اسلام کے ترجمان کے طور پر بھی خدمات انجام دیں۔ ان کے انتقال سے پاکستان کی سیاسی اور مذہبی حلقوں میں ایک سینئر سیاستدان اور ممتاز عالم دین کا خلا پیدا ہو گیا ہے۔
وزیر اعظم شہباز شریف، صدر آصف علی زرداری، جے یو آئی کے سربراہ مولانا فضل الرحمان اور دیگر رہنماؤں نے حافظ حسین احمد کے انتقال پر گہرے رنج و غم کا اظہار کیا ہے۔جمعیت علمائے اسلام (جے یو آئی) کے سربراہ مولانا فضل الرحمان نے ان کے انتقال کو ایک عہد کا اختتام قرار دیتے ہوئے کہا کہ یہ دور خوشگوار یادوں سے بھرپور تھا۔اپنے تعزیتی پیغام میں مولانا فضل الرحمان نے حافظ حسین احمد کے ساتھ اپنی دیرینہ رفاقت کو یاد کرتے ہوئے کہا:
جوانی سے بڑھاپے تک، ہم نے ایک ہی پلیٹ فارم سے ایک ہی مقصد کے لیے جدوجہد کی۔ یہ یادیں ہمیشہ زندہ رہیں گی۔
