پشاور: وزیراعلیٰ خیبرپختونخوا علی امین گنداپور نے اتوار کے روز کہا کہ ان کی حکومت نے افغان حکومت سے مذاکرات کے لیے ایک جرگہ تشکیل دیا ہے۔ تاہم، انہوں نے بتایا کہ یہ جرگہ فی الحال وفاقی حکومت سے اپنے ٹرمز آف ریفرنس (ToRs) کی منظوری کا منتظر ہے، جس کے بعد یہ جرگہ مذاکرات کے لیے افغانستان روانہ ہوگا۔ سرکاری اعلامیے کے مطابق، وزیراعلیٰ نے یہ بات افغان قونصل جنرل حافظ محب اللہ شاکر سے ملاقات کے دوران کہی، جو ان سے ملاقات کے لیے آئے تھے۔ وزیراعلیٰ گنداپور نے کہا کہ تجارت، تعلیم اور علاج معالجے کے لیے سفر کرنے والوں کی سہولت کے لیے سرحد پر خصوصی فسیلیٹیشن ڈیسک قائم کرنے کی کوششیں جاری ہیں۔ انہوں نے کہا کہ قانونی سفری دستاویزات رکھنے والے افغان شہریوں کو خوش آمدید کہا جائے گا۔ علی امین گنداپور نے بتایا کہ خیبرپختونخوا میں علاج اور تعلیم کے خواہاں افغان شہریوں کے لیے ہیلتھ اور ایجوکیشن کارڈز کے اجرا کے سلسلے میں متعلقہ بین الاقوامی اداروں سے بات چیت جاری ہے۔ انہوں نے کہا کہ پاک افغان بارڈر کی بندش کی وجہ سے تاجروں اور ٹرانسپورٹرز کو مشکلات کا سامنا ہے۔
ملاقات میں باہمی دلچسپی کے امور پر گفتگو ہوئی، جن میں دوطرفہ تجارت کے فروغ، علاقائی امن و استحکام اور صوبے میں مقیم افغان شہریوں کو درپیش مسائل شامل تھے۔ گفتگو کے دوران طورخم بارڈر کی بندش اور اس کے دونوں اطراف کے عوام اور تاجروں پر پڑنے والے اثرات پر بھی بات ہوئی۔ دونوں جانب سے بارڈر کو جلد از جلد کھولنے کی کوششوں پر اتفاق کیا گیا۔ وزیراعلیٰ نے کہا کہ بارڈر کی بندش دونوں طرف کے عوام کے مفاد میں نہیں، کیونکہ اس سے نہ صرف کاروبار متاثر ہو رہا ہے بلکہ عام شہری بھی مشکلات کا شکار ہیں۔ انہوں نے بارڈر کو جلد کھولنے کی ضرورت پر زور دیتے ہوئے کہا کہ صوبائی حکومت اس حوالے سے ہر ممکن کوشش کر رہی ہے اور افغان قونصلیٹ سے بھی کردار ادا کرنے کی اپیل کی۔ وزیراعلیٰ نے مزید کہا کہ خطے میں جاری عدم استحکام نے دونوں طرف کے عوام کو پریشانی میں ڈال رکھا ہے اور پائیدار امن کے لیے بات چیت ہی مؤثر راستہ ہے۔
