ٹرمپ-زیلنسکی ملاقات غیر ملکی طاقتوں پر عدم اعتماد کا ثبوت ہے، پاسداران انقلاب

ٹ

پاسدارانِ انقلاب بحریہ کے کمانڈر نے کہا:
"جو بھی خدا کے سوا کسی اور طاقت پر بھروسہ کرے گا، اس کا نتیجہ سب کے سامنے ہوگا، جس کی ایک مثال یوکرین ہے۔”

پاسدارانِ انقلاب (IRGC) بحریہ کے کمانڈر ریئر ایڈمرل علی رضا تنکسری نے ہفتے کے روز امریکی صدر ڈونلڈ ٹرمپ اور یوکرینی صدر ولادیمیر زیلنسکی کے حالیہ ملاقات پر تبصرہ کرتے ہوئے کہا کہ یہ ملاقات غیر ملکی طاقتوں پر بھروسہ کرنے کے نتائج کی واضح مثال ہے۔ صحافیوں سے گفتگو کرتے ہوئے تنکسری نے وائٹ ہاؤس میں ہونے والے اس کشیدہ تبادلہ خیال کا حوالہ دیا جہاں ٹرمپ اور نائب صدر جے ڈی وینس نے زیلنسکی پر امریکی امداد کے لیے عدم تشکر کا الزام لگایا۔ یہ ملاقات جو عسکری امداد اور وسائل کے معاہدوں پر بات چیت کے لیے طے تھی، ایک تلخ بحث کے بعد اچانک ختم ہوگئی، اور زیلنسکی روانہ ہوگئے۔ ملاقات کے بعد، ٹرمپ نے "ٹروتھ سوشل” پر کہا کہ یوکرینی رہنما "امن کے لیے تیار نہیں، اگر اس میں امریکہ شامل ہو۔” اس پر تبصرہ کرتے ہوئے تنکسری نے کہا کہ یہ واقعہ بیرونی طاقتوں پر انحصار کے خطرات کو ظاہر کرتا ہے، خاص طور پر ان طاقتوں پر جو بین الاقوامی معاملات میں غیر معتبر ثابت ہوئی ہیں۔
انہوں نے کہا: "جو بھی خدا کے سوا کسی اور طاقت پر بھروسہ کرے گا، اس کا نتیجہ سب کے سامنے ہوگا، جس کی ایک مثال یوکرین ہے۔” پاسدارانِ انقلاب (IRGC) بحریہ کے سربراہ نے عراق کی مثال دیتے ہوئے کہا کہ امریکہ کی مداخلت نے وہاں ترقی نہیں لائی، جس سے ایران کے اس دیرینہ مؤقف کی توثیق ہوتی ہے کہ خطے کے ممالک کو واشنگٹن پر انحصار کرنے کے بجائے خود انحصاری کو ترجیح دینی چاہیے۔ ایڈمرل تنکسری نے مزید کہا:
"جب ٹرمپ ایک نیم یورپی ملک (یوکرین) کے بارے میں اس قسم کا نظریہ رکھتا ہے، تو یہ ظاہر ہے کہ مسلم ممالک کے ساتھ اس کا رویہ کیسا ہوگا۔”