ماسکو نے دوطرفہ تعلقات کی بحالی کے لیے جاری کوششوں کے تحت امریکہ کے ساتھ براہ راست فضائی سفر کی بحالی کی تجویز دی ہے۔ یہ اعلان روسی وزارت خارجہ نے جمعہ کے روز ترکیہ میں ہونے والے نئے مذاکراتی دور کے بعد کیا۔ امریکہ نے 2022 میں یوکرین تنازعہ کی شدت کے بعد روسی ایئرلائنز پر پابندی عائد کرتے ہوئے براہ راست پروازیں معطل کر دی تھیں اور اپنی فضائی حدود بند کر دی تھیں۔ اس کے بعد سے مسافر استنبول اور دبئی جیسے شہروں کے ذریعے کنیکٹنگ فلائٹس پر انحصار کر رہے ہیں۔
جواباً، ماسکو نے 36 ‘غیر دوستانہ ممالک’ بشمول یورپی یونین کے رکن ممالک اور کینیڈا کی پروازوں پر پابندی لگا دی، جس کے باعث مغربی ایئرلائنز کو متبادل راستے اختیار کرنا پڑے، جس سے ایندھن کی کھپت اور اخراجات میں اضافہ ہوا۔ کچھ یورپی ایئرلائنز نے بعد میں ماسکو پر عائد یورپی یونین کی پابندیوں پر اعتراض کیا اور چینی ایئرلائنز کو روسی فضائی حدود سے گزرنے کی اجازت ملنے کو "غیر منصفانہ” مسابقت قرار دیا۔ وزارت خارجہ کے مطابق، روس نے جمعرات کو استنبول میں امریکی وفد کے ساتھ ملاقات کے دوران پروازیں دوبارہ شروع کرنے کی تجویز دی۔ یہ مذاکرات سفارتی تعلقات میں حائل رکاوٹوں کو کم کرنے، سفارتی مشنز کے معمول کے آپریشنز کی بحالی اور ان کے بہتر انتظامات کو یقینی بنانے پر مرکوز تھے۔ ماسکو نے استنبول میں ہونے والے مذاکرات کو "بامقصد” قرار دیا، جہاں دونوں فریقوں نے بات چیت جاری رکھنے پر اتفاق کیا۔ روسی وزارت خارجہ کے بیان کے مطابق، "خصوصی طور پر، امریکہ کو براہ راست فضائی سروسز کی بحالی کے امکان پر غور کرنے کی دعوت دی گئی۔”
تاہم، کچھ ماہرین روس اور امریکہ کے درمیان فوری طور پر براہ راست پروازوں کی بحالی کے امکان پر شکوک و شبہات کا اظہار کر رہے ہیں۔ ان کا کہنا ہے کہ یورپی فضائی حدود روسی ایئرلائنز کے لیے بدستور بند ہے، جس کی وجہ سے براہ راست فضائی راستے بحال کرنا ایک چیلنج ثابت ہو سکتا ہے۔ ترکیہ میں ہونے والی ملاقات سعودی عرب میں ہونے والے اعلیٰ سطحی مذاکرات اور فروری کے اوائل میں روسی صدر ولادیمیر پیوٹن اور امریکی صدر ڈونلڈ ٹرمپ کے درمیان ہونے والی فون کال کے بعد ہوئی۔
ٹرمپ نے اشارہ دیا ہے کہ واشنگٹن یوکرین تنازع کے حل کے لیے وسیع تر امن مذاکرات کے حصے کے طور پر "کسی موقع پر” روس پر عائد پابندیاں ہٹا سکتا ہے۔
