رہبرِ انقلابِ اسلامی، آیت اللہ سید علی خامنہ ای نے دشمن کو خبردار کیا ہے کہ ظلم اور تکبر کے خلاف پائیدار مزاحمت اُس وقت تک جاری رہے گی جب تک کہ وہ اپنا حتمی مقصد حاصل نہ کر لے۔
آیت اللہ خامنہ ای نے یہ بیان اپنے ایک پیغام میں دیا، جو اتوار کے روز بیروت میں حزب اللہ کے مرحوم رہنما، سید حسن نصراللہ، اور ان کے نائب و نامزد جانشین، سید ہاشم صفی الدین، کی جنازہ گاہ میں پڑھ کر سنایا گیا۔ انہوں نے واضح طور پر فرمایا، "دشمن کو معلوم ہونا چاہیے کہ غصب، ظلم اور تکبر کے خلاف مزاحمت کبھی ختم نہیں ہوگی اور اللہ کی مرضی سے یہ اس کے حتمی ہدف کے حصول تک جاری رہے گی۔”
رہبر نے شہید نصراللہ کو خطے میں مزاحمت کے سب سے بڑے سپہ سالار کے طور پر یاد کیا اور فرمایا کہ وہ اب "عزت و وقار کی بلندیوں” پر فائز ہیں۔ انہوں نے مزید کہا کہ نصراللہ کی روح اور ان کا راستہ ہر گزرتے دن کے ساتھ مزید درخشاں ہوگا اور ان کے پیروکاروں کے لیے روشنی کا مینار بنے گا۔
آیت اللہ خامنہ ای نے سید ہاشم صفی الدین کی خدمات کو بھی خراجِ تحسین پیش کیا اور انہیں لبنان میں مزاحمت کی قیادت کا ایک قریبی ساتھی اور لازم و ملزوم حصہ قرار دیا۔ انہوں نے کہا کہ صفی الدین کا روشن نام اور تابناک شخصیت اس خطے کی تاریخ میں ایک "چمکتا ہوا ستارہ” ہے۔
رہبرِ انقلاب نے دعا کی کہ اللہ تعالیٰ کی رحمت اور اس کے نیک بندوں کی برکتیں ان دونوں معزز شخصیات، دیگر بہادر اور جاں نثار شہداء، اور اسلام کے تمام شہداء پر نازل ہوں۔ انہوں نے خاص طور پر لبنانی بچوں اور دلیر نوجوانوں کو سلام پیش کیا۔
سید حسن نصراللہ 27 ستمبر 2024 کو اسرائیلی بمباری میں شہید ہوئے۔ اسرائیلی جنگی طیاروں نے 85 ٹن بارود استعمال کرتے ہوئے جنوبی بیروت کے علاقے ضاحیہ میں چھ رہائشی عمارتوں کو مکمل طور پر تباہ کر دیا تھا۔ یہ حملہ ایک ہفتے تک جاری رہنے والی بمباری مہم کا حصہ تھا جس نے جنوبی لبنان سے بیروت تک کے کئی علاقوں کو نشانہ بنایا۔
سید ہاشم صفی الدین 3 اکتوبر 2024 کو اسرائیلی حملے میں شہید ہوئے۔ حزب اللہ نے دونوں رہنماؤں کے جنازے کی تقاریب اسرائیلی حملے کے خدشے کے پیش نظر ملتوی کر دی تھیں۔
اتوار کے روز، لبنان کے مختلف علاقوں اور دنیا بھر سے آئے لاکھوں افراد بیروت میں اس تاریخی جنازے میں شریک ہوئے، جو شہید حزب اللہ رہنما اور سابق سربراہِ مجلسِ عاملہ کو خراجِ عقیدت پیش کرنے کے لیے منعقد کیا گیا تھا۔
