وزیر مملکت برائے انفارمیشن ٹیکنالوجی شزا فاطمہ خواجہ کا اظہارِ اعتماد: نئی ٹیلی کام کمپنیاں پاکستان میں داخل ہوں گی
قومی اسمبلی کے اجلاس کے دوران جمعہ کو سوال و جواب کے سیشن میں بات کرتے ہوئے، وزیر مملکت برائے آئی ٹی شزا فاطمہ خواجہ نے کہا کہ پاکستان ٹیلی کمیونیکیشن اتھارٹی (PTA) نے ورچوئل نیٹ ورک لائسنس جاری کرنا شروع کر دیے ہیں۔ انہوں نے ایوان کو آگاہ کیا کہ اس سال کے وسط تک اسپیکٹرم نیلامی کا عمل مکمل کر لیا جائے گا۔ دریں اثنا، پارلیمانی سیکرٹری برائے خزانہ سعد وسیم شیخ نے کہا کہ حکومت کا مزید ٹیکس لگانے کا کوئی ارادہ نہیں اور رواں سال کے محصولات کا ہدف پورا کرنے کے لیے بھرپور کوششیں جاری ہیں۔ پارلیمانی سیکرٹری برائے منصوبہ بندی و ترقی وجیہہ قمر نے قومی اسمبلی کو بتایا کہ ساتویں زرعی مردم شماری کے پہلے مرحلے کی تکمیل ہو چکی ہے۔ انہوں نے کہا کہ یہ مردم شماری زرعی شعبے کی بہتری کے لیے مؤثر پالیسی سازی میں مدد دے گی۔
پارلیمانی سیکرٹری برائے تعلیم فرح ناز اکبر نے ایوان کو بتایا کہ اسلام آباد کے چار سرکاری اسکولوں میں اپریل سے کیمبرج ایجوکیشن سسٹم متعارف کرایا جائے گا۔ انہوں نے کہا کہ یہ ایک پائلٹ پروجیکٹ ہے اور بعد میں دیگر سرکاری اسکولوں میں بھی نافذ کیا جائے گا۔
