وزیر مملکت برائے انفارمیشن ٹیکنالوجی شزا فاطمہ خواجہ نے اعتماد کا اظہار کیا ہے کہ نئی ٹیلی کام کمپنیاں پاکستان میں داخل ہوں گی۔
قومی اسمبلی میں جمعہ کے روز سوال و جواب کے سیشن کے دوران اراکین کے سوالات کے جواب میں انہوں نے کہا کہ پاکستان ٹیلی کمیونیکیشن اتھارٹی (پی ٹی اے) نے ورچوئل نیٹ ورک لائسنس جاری کرنا شروع کر دیے ہیں۔
انہوں نے ایوان کو بتایا کہ اسپیکٹرم نیلامی رواں سال کے وسط تک مکمل کر لی جائے گی۔
پارلیمانی سیکریٹری برائے خزانہ سعد وسیم شیخ نے کہا کہ حکومت کا مزید ٹیکس عائد کرنے کا کوئی ارادہ نہیں، بلکہ رواں سال کے محصولات کے اہداف کو پورا کرنے کے لیے کوششیں جاری ہیں۔
پارلیمانی سیکریٹری برائے منصوبہ بندی و ترقی وجیہہ قمر نے ایوان کو بتایا کہ ساتویں زرعی مردم شماری کا پہلا مرحلہ مکمل کر لیا گیا ہے۔ انہوں نے کہا کہ یہ مردم شماری زرعی شعبے کی ترقی کے لیے بہتر فیصلے کرنے میں معاون ثابت ہوگی۔
پارلیمانی سیکریٹری برائے تعلیم فرح ناز اکبر نے ایوان کو بتایا کہ کیمبرج ایجوکیشن سسٹم رواں سال اپریل سے اسلام آباد کے چار سرکاری اسکولوں میں متعارف کرایا جائے گا۔ انہوں نے کہا کہ یہ ایک پائلٹ پروجیکٹ ہے اور بعد ازاں دیگر سرکاری اسکولوں میں بھی اس کا آغاز کیا جائے گا۔
ایوان کا اگلا اجلاس پیر کے روز شام 5 بجے ہوگا۔
