وزیر اعظم شہباز اور صدر اردگان کا مشترکہ اعلامیہ پر دستخط
اسلام آباد، استنبول کا اسٹریٹجک اور دفاعی تعاون مزید گہرا کرنے پر اتفاق ترک صدر کو وزیر اعظم ہاؤس میں گارڈ آف آنر پیش کیا گیا پاک فضائیہ کے طیاروں نے ترک صدر کے خصوصی طیارے کو پاکستانی فضائی حدود میں خوش آمدید کہا
اسلام آباد: پاکستان اور ترکیہ نے جمعرات کے روز دفاع، معیشت، سائنس، تعلیم اور صحت سمیت مختلف شعبوں میں دوطرفہ تعاون کو مضبوط بنانے پر اتفاق کیا، جبکہ 5 ارب ڈالر کی دوطرفہ تجارتی ہدف کے حصول کے عزم کا اعادہ کیا۔ وزیر اعظم شہباز شریف اور ترک صدر رجب طیب اردگان کے درمیان دوطرفہ ملاقات اور ہائی لیول اسٹریٹجک کوآپریشن کونسل کے ساتویں اجلاس میں تعلقات اور تعاون پر تفصیلی تبادلہ خیال کیا گیا۔ اس اجلاس میں تجارت، سرمایہ کاری، دفاع، زراعت، تعلیم، توانائی، سائنس و ٹیکنالوجی اور بنیادی ڈھانچے سمیت وسیع شعبوں پر غور کیا گیا۔ دونوں رہنماؤں نے اپنی ملاقات اور ہائی لیول اسٹریٹجک کوآپریشن کونسل اجلاس کے بعد مشترکہ پریس کانفرنس میں میڈیا سے گفتگو کرتے ہوئے دہشت گردی کے خلاف مشترکہ دشمن سمجھتے ہوئے مل کر جدوجہد جاری رکھنے کے عزم کا اظہار کیا.وزیر اعظم شہباز شریف نے اپنے خطاب میں کہا کہ دونوں ممالک نے تجارت، اسٹریٹجک اور دفاعی تعاون سمیت مختلف امور پر تبادلہ خیال کیا اور ترک کمپنی کی جانب سے تعمیر کیے جانے والے خصوصی اقتصادی زون سمیت مختلف شعبوں میں تعاون کے معاہدوں پر دستخط کیے۔ انہوں نے کہا، "میں آپ کو یقین دلاتا ہوں کہ میں آپ کے ساتھ قریبی تعاون کروں گا اور ہماری ٹیمیں ان مفاہمتی یادداشتوں کو عملی جامہ پہنانے کے لیے مل کر کام کریں گی۔ وزیر اعظم نے ترک صدر کا خیرمقدم کرتے ہوئے کہا کہ وہ پانچ سال بعد پاکستان کے دورے پر آئے ہیں، اور پاکستان و ترکیہ کے تعلقات صرف قیامِ پاکستان کے بعد نہیں بلکہ صدیوں پر محیط ہیں۔ انہوں نے کہا کہ ترک آزادی کی تحریک کے دوران برصغیر کے مسلمانوں نے ترک عوام کی مکمل حمایت کی، اور ترک قوم نے بھی اس جذبے کا بے پناہ خلوص اور فراخ دلی کے ساتھ جواب دیا۔ وزیر اعظم شہباز شریف نے کہا کہ زلزلہ ہو یا سیلاب، ترکیہ ہر مشکل گھڑی میں پاکستان کے ساتھ کھڑا رہا۔ انہوں نے 2010 میں پاکستان کے سیلاب زدہ علاقوں کے دورے کے دوران صدر اردگان اور خاتون اول کی آمد کو یاد کیا اور گھروں اور اسکولوں کی تعمیر نو میں ترکیہ کی مدد کو سراہا۔ انہوں نے کہا کہ صدر اردگان کا یہ دورہ دوطرفہ دوستی کو نئی بلندیوں تک لے جائے گا اور انہیں مسلم دنیا کا ایک انتہائی قابل احترام رہنما قرار دیا، خاص طور پر ان کے غزہ، فلسطین اور کشمیر کے مسائل پر مضبوط مؤقف کے باعث۔ وزیر اعظم نے کہا، "ترکیہ نے ہمیشہ کشمیر کے جائز مؤقف پر پاکستان کا ساتھ دیا ہے۔ آپ نے ہمیشہ اپنے مؤقف کو دوٹوک اور واضح رکھا۔ اسی طرح، پاکستان نے شمالی قبرص کے مسئلے پر ترکیہ کے مؤقف کی بھرپور حمایت کی اور ہر سطح پر اس کے ساتھ کھڑا رہا۔” انہوں نے پاکستان کے عوام اور مسلح افواج کی دہشت گردی کے خلاف قربانیوں کو سراہنے پر ترک صدر کا شکریہ ادا کیا۔
"ہم مل کر اس لعنت کے خلاف جنگ لڑیں گے اور اس وقت تک آرام سے نہیں بیٹھیں گے جب تک اسے جڑ سے ختم نہ کر دیں،” وزیر اعظم نے عزم کا اظہار کرتے ہوئے افغان حکومت سے بھی مطالبہ کیا کہ وہ اس لعنت کے خاتمے میں اپنا کردار ادا کرے۔ ترک صدر رجب طیب اردگان نے اپنے خطاب میں کہا کہ ہائی لیول اسٹریٹجک کوآپریشن کونسل دو صدیوں پر محیط دوستی کو باضابطہ بنانے کا سب سے اعلیٰ سطح کا فورم ہے۔ انہوں نے بتایا کہ HLSCC اجلاس میں دونوں ممالک نے تعلقات کو مزید مستحکم کرنے پر اتفاق کیا اور بعد ازاں 24 مفاہمتی یادداشتوں (MoUs) اور معاہدوں پر دستخط کیے۔ ان معاہدوں کا مقصد تجارت، آبی وسائل، زراعت، توانائی، ثقافت، سائنس، بینکاری، تعلیم، دفاع اور صحت کے شعبوں میں تعاون کو فروغ دینا ہے۔ صدر اردگان نے کہا کہ انہوں نے وزیر اعظم شہباز شریف کے ساتھ دوطرفہ ملاقات میں باہمی، علاقائی اور عالمی امور پر تفصیلی تبادلہ خیال کیا۔ انہوں نے ترک سرمایہ کاروں کو پاکستان میں مزید سرمایہ کاری اور بڑے منصوبے شروع کرنے کی ترغیب دی۔ انہوں نے میڈیا کو بتایا کہ دونوں ممالک نے 5 ارب ڈالر کی تجارتی ہدف کے حصول کی کوششیں جاری رکھنے اور گڈز ٹریڈ ایگریمنٹ کے دائرہ کار کو ابتدائی مرحلے میں وسعت دینے پر بھی اتفاق کیا ہے۔ دونوں رہنماؤں نے اس بات کا مشاہدہ کیا کہ دفاعی شعبے میں فوجی مذاکرات اور تعاون نے تجارتی اور سرمایہ کاری کے تعلقات کو وسعت دی ہے اور اس حوالے سے خریداری اور مشترکہ پیداواری منصوبوں پر بھی اتفاق کیا گیا ہے۔ ترک صدر رجب طیب اردگان نے وزیر اعظم شہباز شریف کا شکریہ ادا کرتے ہوئے کہا کہ وہ زلزلے کے بعد ترکیہ کا دورہ کرنے والے پہلے عالمی رہنما تھے۔ انہوں نے دہشت گردی کے خلاف جنگ اور علاقائی استحکام کے لیے پاکستان کی قربانیوں کو سراہا اور ہر ممکن تعاون کی یقین دہانی کرائی۔ ترک صدر نے کہا کہ ترکیہ کشمیری عوام کے ساتھ مکمل یکجہتی کا اظہار کرتا ہے اور اقوام متحدہ کی قراردادوں اور کشمیری عوام کی امنگوں کے مطابق اس مسئلے کے حل کا خواہاں ہے۔ انہوں نے شمالی قبرص کے مؤقف کی حمایت پر پاکستان کا شکریہ ادا کیا اور کہا کہ ترکیہ اور پاکستان اقوام متحدہ اور او آئی سی میں فلسطینی عوام کے حق میں مسلسل کوششیں کر رہے ہیں۔ انہوں نے اس عزم کا اظہار کیا کہ القدس الشریف کو دارالحکومت بنا کر ایک آزاد فلسطینی ریاست کے قیام کے لیے جدوجہد جاری رہے گی۔
گارڈ آف آنر
ترک صدر رجب طیب اردگان کو جمعرات کے روز وزیر اعظم ہاؤس پہنچنے پر گارڈ آف آنر پیش کیا گیا، جہاں انہوں نے وزیر اعظم شہباز شریف کے ساتھ دوطرفہ ملاقات کی۔ وزیر اعظم شہباز شریف نے وزیر اعظم ہاؤس کے مرکزی دروازے پر صدر اردوان کا پرتپاک استقبال کیا۔ جب صدر اردوان کا موٹروکیڈ آئینِ پاکستان ایونیو سے گزرا تو پاکستان اور ترکیہ کے جھنڈوں اور استقبالیہ بینرز کی شاندار نمائش کے ساتھ اس کا خیر مقدم کیا گیا۔ روایتی لباس میں ملبوس مقامی فنکاروں نے سڑک کے کنارے پرجوش لوک رقص پیش کیے۔ سفید چوغے اور لمبی مخروطی ٹوپیاں پہنے مردوں کے ایک گروپ نے ترکیہ کی ثقافت میں مشہور گردشی درویشوں کا علامتی رقص پیش کیا۔ وزیر اعظم ہاؤس میں منعقدہ رسمی استقبالیہ تقریب کے دوران پاکستان اور ترکیہ کے قومی ترانے بجائے گئے، جب کہ معزز مہمان نے سلامی کے چبوترے پر کھڑے ہو کر احترام کا اظہار کیا۔ مسلح افواج کے چاق و چوبند دستوں نے صدر اردوان کو گارڈ آف آنر پیش کیا جس کا انہوں نے معائنہ کیا۔ بعد ازاں وزیر اعظم شہباز شریف اور صدر اردوان نے اپنی متعلقہ وفود کا ایک دوسرے سے تعارف کرایا اور دو طرفہ ملاقات کے لیے روانہ ہو گئے۔
ترک صدر نے وزیر اعظم ہاؤس کے باغ میں ایک صنوبر کا پودا بھی لگایا تاکہ دونوں اقوام کے درمیان گہرے دوستانہ تعلقات کی علامت کو اجاگر کیا جا سکے۔ پاک فضائیہ کے طیاروں نے صدر اردوان کے استقبال کے لیے ایک شاندار فلائی پاسٹ بھی کیا۔ اس موقع پر چیف آف آرمی اسٹاف جنرل سید عاصم منیر بھی موجود تھے۔ بعد ازاں دونوں رہنما اعلیٰ سطحی اسٹریٹجک تعاون کونسل کے اجلاس کی سربراہی کریں گے، جس میں مختلف شعبوں میں دو طرفہ تعاون پر تبادلہ خیال کیا جائے گا۔ صدر اردوان، خاتون اول امینہ اردوان اور ایک اعلیٰ سطحی وفد کے ہمراہ بدھ کی رات نور خان ایئربیس پر پہنچے، جہاں صدر آصف علی زرداری، وزیر اعظم شہباز شریف، خاتون اول آصفہ بھٹو، نائب وزیر اعظم و وزیر خارجہ اسحاق ڈار اور دیگر وزراء نے ان کا گرم جوشی سے استقبال کیا۔ پاک فضائیہ کے طیاروں نے صدر اردوان کے خصوصی طیارے کو پاکستانی فضائی حدود میں داخل ہوتے ہی اسکواڈرن کی صورت میں پروٹوکول دیا۔
معاہدے، مفاہمتی یادداشتیں اور پروٹوکولز
وزیر اعظم شہباز شریف اور ترکیہ کے صدر رجب طیب اردوان نے پاکستان اور ترکیہ کے درمیان اسٹریٹجک شراکت داری کو مزید گہرا، متنوع اور ادارہ جاتی بنانے کے لیے پاکستان-ترکیہ اعلیٰ سطحی اسٹریٹجک کونسل کے ساتویں اجلاس کے اختتام پر ایک مشترکہ اعلامیے پر دستخط کیے۔ دستخطی تقریب جمعرات کو وزیر اعظم ہاؤس اسلام آباد میں منعقد ہوئی۔ اس موقع پر پاکستان اور ترکیہ نے مختلف شعبوں میں تعاون کو فروغ دینے اور تعلقات کو مزید مضبوط بنانے کے لیے 24 معاہدوں، مفاہمتی یادداشتوں (MoUs) اور پروٹوکولز کا تبادلہ کیا۔ دونوں ممالک نے دفاعی شعبے میں تعاون بڑھانے کے لیے چار مفاہمتی یادداشتوں، توانائی، بجلی اور کان کنی کے شعبے میں دو ایم او یوز اور ایک پروٹوکول، تجارتی و صنعتی تعاون کے فروغ کے لیے تین ایم او یوز، پانی اور بیج کی پیداوار سے متعلق دو معاہدوں، سائنسی تعلیم و تربیت میں تعاون بڑھانے کے لیے دو ایم او یوز، بینکاری شعبے میں دو ایم او یوز، مذہبی خدمات اور مذہبی تعلیم میں دو طرفہ تعاون کو فروغ دینے کے لیے ایک ایم او یو، حلال خوراک کے شعبے میں ایک ایم او یو، میڈیا اور عوامی روابط کے میدان میں ایک ایم او یو، قانونی شعبے میں ایک ایم او یو، صحت و فارماسیوٹیکل شعبے میں ایک ایم او یو، ایرو اسپیس انڈسٹری میں تعاون کے فروغ کے لیے ایک ایم او یو، ثقافتی تعاون اور مشترکہ پروڈکشن کے شعبے میں دو معاہدے کیے۔ اس کے علاوہ پاکستان-ترکیہ بزنس فورم کی جانب سے کاروباری شعبے میں دو طرفہ تعاون بڑھانے کے لیے دو مفاہمتی یادداشتوں کا بھی تبادلہ کیا گیا۔
پاکستان-ترکیہ بزنس فورم
دریں اثناء وزیر اعظم شہباز شریف نے ترک تاجروں اور سرمایہ کاروں کو پاکستان میں مختلف شعبوں میں سرمایہ کاری کی دعوت دی۔ پاکستان-ترکیہ بزنس فورم سے خطاب کرتے ہوئے انہوں نے کہا کہ دونوں ممالک نے پانچ ارب ڈالر کی دو طرفہ تجارت کے ہدف کے حصول کا عزم کر رکھا ہے۔ انہوں نے کہا کہ پاکستان اور ترکیہ نے کئی مفاہمتی یادداشتوں اور معاہدوں پر دستخط کیے ہیں، لیکن اب ہمیں انہیں عملی جامہ پہنانا ہوگا۔ وزیر اعظم نے یقین دہانی کرائی کہ وہ کاروباری تعلقات کو فروغ دینے کے لیے B2B یا G2G سطح پر تمام کوششوں کی بھرپور حمایت کریں گے۔ انہوں نے ترک سرمایہ کاروں اور تاجروں کو یقین دلایا کہ پاکستان ان کا دوسرا گھر ہے۔ انہوں نے مزید کہا کہ پاکستان اور ترکیہ برادر ممالک اور قریبی دوست ہیں، جن کی دوستی کی تاریخ تحریک آزادی کے دور سے جا ملتی ہے۔ وزیر اعظم نے اس عزم کا اظہار کیا کہ ہم مل کر کام کریں گے تاکہ پاکستان اور ترکیہ کی دوستی کو "دو جان ایک قالب” کی مانند بنایا جا سکے۔ وزیر اعظم نے کہا کہ رجب طیب اردوان صرف ترکیہ کے ہی نہیں بلکہ پوری اسلامی دنیا کے عظیم رہنما ہیں اور ہم ان کی قیادت پر فخر محسوس کرتے ہیں۔ انہوں نے کہا کہ صدر اردوان کی آواز پوری مسلم امہ کی آواز ہے، خاص طور پر وہ غزہ، فلسطین اور کشمیر کے مظلوم عوام کے لیے مضبوط موقف رکھتے ہیں۔ ترک صدر رجب طیب اردوان نے فورم سے خطاب کرتے ہوئے دو طرفہ تجارتی روابط کو بہتر بنانے اور بالخصوص ریل و سڑک کے نقل و حمل کے شعبے میں ترقی کی ضرورت پر زور دیا۔ انہوں نے پاکستانی کمپنیوں کو ترکیہ میں مختلف شعبوں میں سرمایہ کاری کی دعوت بھی دی۔ انہوں نے کہا کہ پاکستان اور ترکیہ کے درمیان دو طرفہ تجارت مضبوط ہو رہی ہے۔ 2024 میں تجارتی حجم تقریباً 30 فیصد اضافے کے ساتھ 1.4 ارب ڈالر تک پہنچ گیا ہے۔ صدر اردوان نے امید ظاہر کی کہ موجودہ تجارتی معاہدے کے دائرہ کار کو بڑھانے سے تجارت کے حجم میں مستحکم اور متوازن اضافہ ہوگا۔ انہوں نے کہا کہ پاکستان اپنی متحرک آبادی، زرخیز زرعی زمینوں اور بین الاقوامی تجارتی راستوں پر اسٹریٹجک پوزیشن کے ساتھ مستقبل کی بڑی معیشتوں میں شامل ہونے کا ایک اہم امیدوار ہے انہوں نے مزید کہا کہ اس وقت 50 سے زائد ترک سرکاری اور نجی کمپنیاں پاکستان میں کام کر رہی ہیں۔ 2023 میں ترکیہ میں آنے والے زلزلے کا ذکر کرتے ہوئے، صدر اردوان نے اس مشکل وقت میں پاکستانی عوام کی حمایت، دعاؤں اور یکجہتی کو سراہا اور اس عزم کا اظہار کیا کہ ترکیہ ہر آزمائش میں پاکستان کے ساتھ کھڑا ہوگا۔
