ایف بی آر کا فیصلہ: خریداری کیش کے بجائے ڈیبٹ اور کریڈٹ کارڈ سے کی جائے گی
پاکستان کے فیڈرل بورڈ آف ریونیو (FBR) نے عالمی مالیاتی فنڈ (IMF) کی شرائط کو پورا کرنے اور ریونیو بڑھانے کے لیے ایک اور بڑا فیصلہ کیا ہے۔ اب ملک بھر میں خریداری کیش کے بجائے ڈیبٹ اور کریڈٹ کارڈز کے ذریعے کی جائے گی۔
اس فیصلے کے تحت، کاروباری شعبے کو دستاویزی شکل دی جائے گی، اور پہلے مرحلے میں پوائنٹ آف سیل (POS) کی مشینوں کی تنصیب ٹیئر ون ریٹیلرز اور بڑی دوکانوں پر لازمی قرار دی گئی ہے۔ یہ مشینیں ایف بی آر کے کمپیوٹرائزڈ سسٹم سے منسلک ہوں گی، اور تمام ٹرانزیکشنز کی سی سی ٹی وی کے ذریعے نگرانی کی جائے گی۔
ماہر اقتصادی امور ڈاکٹر خاقان نجیب نے کہا کہ اس فیصلے کا مقصد پاکستان کو ڈیجیٹل پیمنٹس کی طرف لے جانا ہے، جیسا کہ دنیا بھر کے ممالک بھی اسی سمت میں جا رہے ہیں۔ ڈاکٹر ساجد امین نے کہا کہ اس منصوبے کی کامیاب تکمیل کے لیے حکومت کو واضح موقف اختیار کرنا ہوگا اور ٹیکس نیٹ میں لوگوں کو شامل کرنے کے اس عمل کو صرف ٹیکس وصولی تک محدود نہیں سمجھنا چاہیے، بلکہ اسے دستاویزی معیشت کے فوائد کی طرف بھی دیکھنا چاہیے۔
