بیجنگ، 5 فروری (اے پی پی): صدر مملکت آصف علی زرداری اور چین کے صدر شی جن پنگ نے ملاقات کے دوران مشترکہ مستقبل کی پاک۔چین کمیونٹی کو مضبوط بنانے کے لیے عوامی روابط اور ثقافتی تبادلوں کی ضرورت پر زور دیا ہے۔ انہوں نے کہا کہ پاک چین اقتصادی راہداری (CPEC) سے علاقائی روابط، مشترکہ فوائد اور خوشحالی کو فروغ حاصل ہوگا۔
بدھ کے روز ایوان صدر کے پریس ونگ سے جاری اعلامیہ کے مطابق، صدر مملکت آصف علی زرداری نے چین کے عظیم عوامی ایوان میں چین کے صدر شی جن پنگ کے ساتھ وفود کی سطح پر ملاقات کی۔ اس ملاقات میں دوطرفہ تعلقات کی مثبت رفتار پر تبادلہ خیال کیا گیا اور بین الاقوامی امور پر بھی گفتگو ہوئی۔
ملاقات سے قبل صدر مملکت کے اعزاز میں ایک استقبالیہ تقریب منعقد کی گئی، جہاں چین کے عظیم عوامی ایوان میں آمد پر صدر شی جن پنگ نے صدر آصف علی زرداری کا پرتپاک استقبال کیا۔ اس موقع پر چینی بچوں کے ایک گروپ نے بھی صدر مملکت کا شاندار استقبال کیا۔
صدر مملکت آصف علی زرداری اور چین کے صدر شی جن پنگ کے درمیان وفود کی سطح پر ملاقات ہوئی، جس میں دونوں صدور نے دوطرفہ تعلقات کی مثبت رفتار پر تبادلہ خیال کیا.صدر مملکت اور چینی صدر کی ملاقات میں مشترکہ دلچسپی کے علاقائی اور بین الاقوامی مسائل پر بھی گفتگو ہوئی۔ دونوں رہنماؤں نے دوطرفہ شراکت داری کے دائرہ کار کو مزید وسعت دینے کے مواقع پر تبادلہ خیال کیا اور بنیادی دلچسپی کے امور پر ایک دوسرے کی حمایت کے عزم کا اعادہ کیا۔صدر مملکت نے گفتگو کے دوران چین کے ساتھ سدا بہار تزویراتی تعاون کی شراکت داری کے لیے پاکستان کے غیر متزلزل عزم کا اعادہ کیا۔ انہوں نے دونوں ممالک کے درمیان منفرد، آزمودہ اور خصوصی تعلقات کو اجاگر کرتے ہوئے کہا کہ چین کی مثالی ترقی اور خوشحالی چینی قیادت کے وژن اور چینی عوام کی انتھک محنت کا مظہر ہے۔صدر مملکت نے بیلٹ اینڈ روڈ منصوبے کے تحت عالمی ترقی میں چین کے گہرے تعاون پر صدر شی جن پنگ کو زبردست خراج تحسین پیش کیا۔انہوں نے کہا کہ پاک چین اقتصادی راہداری بیلٹ اینڈ روڈ منصوبے کے تحت باہمی طور پر سودمند تعاون کے تصور کی روشن مثال ہے۔ ملاقات کے دوران پاک چین اقتصادی راہداری 2.0 کی اعلیٰ معیار کی ترقی پر بھی تبادلہ خیال کیا گیا۔صدر آصف علی زرداری اور چینی صدر شی جن پنگ کے درمیان وفود کی سطح پر ملاقات کے موقع پر ایک اعلامیہ بھی جاری کیا گیا۔ اعلامیہ میں کہا گیا کہ پاک چین اقتصادی راہداری سے علاقائی روابط، مشترکہ فوائد اور خوشحالی کو فروغ حاصل ہوگا۔ملاقات میں مشترکہ مستقبل کی پاک۔چین کمیونٹی کو مضبوط بنانے کے لیے عوامی روابط اور ثقافتی تبادلوں کی ضرورت پر بھی زور دیا گیا۔ اس موقع پر صدر آصف علی زرداری نے چین کے صدر شی جن پنگ کو دورۂ پاکستان کی دعوت دی۔صدر مملکت نے کہا کہ پاکستان کے عوام اور حکومت صدر شی جن پنگ کو ایک وژنری رہنما اور پاکستان کے خاص دوست کے طور پر انتہائی قدر کی نگاہ سے دیکھتے ہیں۔ملاقات کے بعد مفاہمت کی یادداشتوں پر دستخط کی تقریب بھی منعقد ہوئی۔ اس تقریب میں سائنس و ٹیکنالوجی، میڈیا، توانائی اور سماجی و اقتصادی ترقی سمیت دیگر شعبوں میں تعاون بڑھانے کے لیے مفاہمت کی یادداشتوں پر دستخط کیے گئے۔بعد ازاں، چین کے صدر شی جن پنگ نے صدر آصف علی زرداری اور ان کے وفد کے اعزاز میں عشائیے کا بھی اہتمام کیا۔۔
