بیجنگ (مشرق نامہ) – چین نے کیریبین میں دیگر ممالک کے جہازوں کو من مانی طور پر ضبط کرنے پر امریکا کو شدید تنقید کا نشانہ بنایا ہے، جب کہ یہ بیان وینزویلا سے متعلق بڑھتی ہوئی کشیدگی کے تناظر میں سامنے آیا ہے۔
چینی وزارتِ خارجہ کے ترجمان لن جیان نے پیر کے روز بیجنگ میں صحافیوں کو بتایا کہ امریکا کا دیگر ممالک کے جہازوں کو بلاجواز ضبط کرنا بین الاقوامی قوانین کی صریح خلاف ورزی ہے۔ ان کا کہنا تھا کہ چین ایسی یکطرفہ اور غیر قانونی پابندیوں کی مخالفت کرتا ہے جن کی نہ تو بین الاقوامی قانون میں کوئی بنیاد ہو اور نہ ہی اقوامِ متحدہ کی سلامتی کونسل کی اجازت حاصل ہو۔
بیجنگ کا یہ ردِعمل ایسے وقت میں سامنے آیا ہے جب امریکی افواج کیریبین میں ایک اور وینزویلا سے متعلق تیل بردار جہاز کا تعاقب کر رہی ہیں۔ اگر اس جہاز کو بھی ضبط کیا گیا تو یہ 10 دسمبر کے بعد تیسرا واقعہ ہوگا۔
بلومبرگ کی رپورٹ کے مطابق امریکی کوسٹ گارڈ کی کارروائی پاناما کے جھنڈے تلے رجسٹرڈ بیلا ون نامی آئل ٹینکر کو نشانہ بنا رہی ہے، جس پر امریکا کی جانب سے پابندیاں عائد ہیں اور جو وینزویلا کی جانب تیل لوڈ کرنے کے لیے جا رہا تھا۔ اس سے قبل ہفتے کے روز سینچریز سپر ٹینکر اور 10 دسمبر کو اسکیپر نامی جہاز کو روکا گیا تھا۔
یہ پیش رفت واشنگٹن اور کراکس کے درمیان کشیدگی میں اضافے کے پس منظر میں سامنے آئی ہے۔ امریکی صدر ڈونلڈ ٹرمپ نے پابندیوں کی زد میں آنے والے تیل بردار جہازوں کے وینزویلا میں داخلے اور وہاں سے روانگی پر مکمل ناکہ بندی کا اعلان کیا تھا۔
وینزویلا نے امریکی اقدامات کو بین الاقوامی قزاقی قرار دیتے ہوئے شدید مذمت کی ہے۔ واشنگٹن کا مؤقف ہے کہ یہ اقدامات بدعنوانی اور منشیات کی اسمگلنگ کے خلاف ہیں، جبکہ کراکس کا الزام ہے کہ امریکا انسدادِ منشیات کارروائیوں کو صدر نکولس مادورو کی حکومت کے خاتمے اور وینزویلا کے تیل وسائل پر قبضے کے لیے بہانے کے طور پر استعمال کر رہا ہے۔
چینی وزارتِ خارجہ کے ترجمان کے مطابق چین ہر اس اقدام کی مخالفت کرتا ہے جو اقوامِ متحدہ کے چارٹر کے مقاصد کے خلاف ہو، دیگر ممالک کی خودمختاری اور سلامتی کو نقصان پہنچائے اور یکطرفہ دباؤ یا طاقت کے استعمال پر مبنی ہو۔ ان کا مزید کہنا تھا کہ وینزویلا کو یہ حق حاصل ہے کہ وہ دیگر ممالک کے ساتھ باہمی مفاد پر مبنی تعاون خود مختاری کے ساتھ فروغ دے، اور چین کا ماننا ہے کہ عالمی برادری وینزویلا کے اپنے حقوق کے دفاع کے مؤقف کو سمجھ سکتی ہے اور اس کی حمایت کرے گی۔
