اسلام آباد (مشرق نامہ) – محکمۂ موسمیات پاکستان (پی ایم ڈی) نے پیش گوئی کی ہے کہ 22 سے 24 دسمبر کے دوران ملک کے بالائی اور مغربی علاقوں میں وسیع پیمانے پر بارش، آندھی، گرج چمک اور شدید برفباری متوقع ہے۔
پی ایم ڈی کے مطابق ایک مضبوط مغربی ہواؤں کا نظام 19 دسمبر سے پاکستان میں داخل ہو رہا ہے، جو ملک بھر میں نمایاں موسمی تبدیلیوں کا باعث بنے گا۔ یہ سسٹم 19 دسمبر کو بلوچستان میں داخل ہوگا اور 20 دسمبر تک بتدریج شمالی علاقوں کو اپنی لپیٹ میں لے لے گا، جس کے نتیجے میں چار دن تک مختلف علاقوں میں بارش اور برفباری کا سلسلہ جاری رہنے کا امکان ہے۔
اس موسمی نظام کے زیرِ اثر سب سے پہلے بلوچستان متاثر ہوگا، جہاں 19 دسمبر کی شام سے 20 دسمبر تک کوئٹہ، زیارت، چمن، پشین، قلعہ عبداللہ، قلعہ سیف اللہ، نوشکی، ہرنائی، ژوب، موسیٰ خیل، تربت، گوادر، جیوانی، لسبیلہ، کیچ، آواران، پنجگور، خضدار، واشک، چاغی، خاران اور قلات میں بارش، تیز ہواؤں، گرج چمک اور پہاڑی علاقوں میں برفباری متوقع ہے۔
بعد ازاں یہ نظام خیبرپختونخوا کی جانب بڑھے گا، جہاں 20 دسمبر کی رات سے 22 دسمبر تک چترال، دیر، سوات، شانگلہ، کوہستان، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک، ڈیرہ اسماعیل خان، ٹانک اور کوہاٹ میں وقفے وقفے سے بارش، آندھی اور بالائی علاقوں میں درمیانی درجے کی برفباری کا امکان ہے۔
گلگت بلتستان اور کشمیر کے بالائی پہاڑی علاقوں میں درمیانی سے شدید برفباری متوقع ہے۔ گلگت بلتستان کے علاقوں دیامر، استور، غذر، اسکردو، ہنزہ، گلگت، گانچھے اور شگر کے ساتھ ساتھ کشمیر کے نیلم ویلی، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں 20 دسمبر کی رات سے 23 دسمبر کی صبح تک بارش، آندھی اور کہیں کہیں شدید برفباری کا امکان ظاہر کیا گیا ہے۔
پنجاب اور وفاقی دارالحکومت میں 20 دسمبر کی شام سے 21 دسمبر تک اسلام آباد، راولپنڈی، پوٹھوہار ریجن، میانوالی، بھکر، نورپور تھل اور لیہ میں بارش اور گرج چمک متوقع ہے۔ سیاحتی مقامات مری اور گلیات میں 20 دسمبر کی رات سے 21 دسمبر تک بارش کے ساتھ برفباری کا امکان ہے۔
اسی دوران سرگودھا، خوشاب، فیصل آباد، حافظ آباد، گوجرانوالہ، منڈی بہاؤالدین، گجرات، سیالکوٹ، نارووال، لاہور، شیخوپورہ، ملتان، جھنگ، ڈیرہ غازی خان اور ٹوبہ ٹیک سنگھ سمیت پنجاب کے کئی شہروں میں 20 اور 21 دسمبر کو ابر آلود موسم اور ہلکی بوندا باندی متوقع ہے۔
سندھ کے بیشتر علاقوں میں 19 اور 20 دسمبر کو جزوی سے مکمل ابر آلود موسم رہنے کا امکان ہے۔
محکمۂ موسمیات نے ممکنہ اثرات کے حوالے سے اہم ہدایات بھی جاری کی ہیں۔ 20 سے 22 دسمبر کے دوران ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، مری، گلیات، نیلم ویلی، باغ، پونچھ اور حویلی میں شدید برفباری کے باعث سڑکوں کی بندش اور پھسلن پیدا ہونے کا خدشہ ہے۔
بالائی خیبرپختونخوا، گلگت بلتستان اور کشمیر کے پہاڑی علاقوں میں لینڈ سلائیڈنگ اور برفانی تودے گرنے کے امکانات بھی ظاہر کیے گئے ہیں۔ محکمۂ موسمیات نے سیاحوں کو ہدایت کی ہے کہ وہ اس دوران غیر ضروری سفر سے گریز کریں اور انتہائی احتیاط برتیں۔
