مانٹرہنگ ڈیسک(مشرق نامہ) پاک بحریہ نے منگل کے روز اعلان کیا کہ اس نے مقامی طور پر تیار کردہ اینٹی شپ بیلسٹک میزائل کا ایک کامیاب تجرباتی لانچ کیا ہے۔ یہ تجربہ ایک مقامی سطح پر تیار کردہ نیول پلیٹ فارم سے کیا گیا، جو پاکستان کی بڑھتی ہوئی دفاعی صلاحیتوں میں ایک اہم پیش رفت ہے۔
آئی ایس پی آر کے مطابق، اس جدید ترین میزائل نظام نے سمندری اور زمینی دونوں قسم کے اہداف کو انتہائی درستگی کے ساتھ نشانہ بنانے کی اپنی صلاحیت ثابت کر دی ہے۔ یہ ہتھیار جدید رہنمائی ٹیکنالوجی اور ایسے فیچرز سے لیس ہے جو اسے پیچیدہ ماحول، الیکٹرانک جنگی اقدامات اور دفاعی رکاوٹوں کو عبور کرنے کے قابل بناتے ہیں۔
پاک بحریہ کے ترجمان نے بتایا کہ چیف آف دی نیول اسٹاف نے تجربے کا مشاہدہ کیا، جب کہ اس پروگرام سے وابستہ سینئر سائنس دان اور انجینئرز بھی موجود تھے۔
ترجمان کے مطابق کامیاب تجربہ پاکستان کی بڑھتی ہوئی تکنیکی مہارت کا مظہر ہے اور قومی مفادات کے دفاع کے لیے پاک بحریہ کے عزم کی مضبوطی کو ظاہر کرتا ہے۔
قومی قیادت کی مبارکباد
صدر آصف علی زرداری، وزیر اعظم شہباز شریف، چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور سروسز چیفس نے اس نمایاں کامیابی پر تمام متعلقہ یونٹس، سائنس دانوں اور انجینئرز کو مبارکباد پیش کی۔
حالیہ دفاعی پیش رفت
گزشتہ چند ماہ کے دوران پاکستان اپنی دفاعی صلاحیتوں کو مسلسل مضبوط کر رہا ہے۔
اس سے قبل ستمبر میں پاک فوج نے فاتح-4 نامی نئے تیار کردہ گراؤنڈ لانچ کروز میزائل کا تربیتی تجربہ کیا تھا، جس کی رینج 750 کلومیٹر ہے۔
فوج کے مطابق، فاتح-4 جدید ایویونکس اور نیویگیشنل سسٹمز سے لیس ہے اور انتہائی کم بلندی پر زمین کے ساتھ ساتھ پرواز کر کے میزائل ڈیفنس سسٹمز سے بچنے کی صلاحیت رکھتا ہے، جس کے باعث ہدف کو انتہائی درستگی سے نشانہ بنانا ممکن ہوتا ہے۔
