اسلام آباد(مشرق نامہ):پاکستان نے ملائشیا کو برآمدات میں 200 ملین ڈالر کے ہدف کے حصول کے لیے ایک جامع مارکیٹ انٹری پیکیج تیار کر لیا ہے۔ یہ ایکشن پلان وزیرِ اعظم کی کمیٹی برائے گوشت کی برآمدات کے اجلاس میں پیش کیا گیا۔
اجلاس کی صدارت وزیرِ اعظم کے معاونِ خصوصی برائے صنعت و پیداوار ہارون اختر خان نے کی۔ کمیٹی کے تحت قائم کردہ چار ورکنگ گروپس نے اپنی رپورٹس پیش کیں۔
اس وقت بھارت دنیا کے سب سے بڑے بھینس کے گوشت (Carabeef) برآمد کنندگان میں شامل ہے۔ مالی سال 2023-24 میں بھارت نے تقریباً 1.29 ملین ٹن بھینس کا گوشت برآمد کیا، جس سے 3.7 ارب ڈالر کا زرمبادلہ حاصل ہوا۔ اس کے اہم خریدار ممالک ویتنام، ملائشیا، مصر، عراق، اور متحدہ عرب امارات ہیں۔ گزشتہ دہائی میں بھارت کی یہ برآمدات مسلسل بڑھتی رہی ہیں، اگرچہ سپلائی میں وقتاً فوقتاً مشکلات پیش آئیں۔
وزیرِ اعظم شہباز شریف کے حالیہ ملائشیا کے دورے کے دوران دونوں ممالک نے حلال گوشت کی تجارت کو وسعت دینے پر اتفاق کیا۔ ملائشیا نے پاکستان سے بیف درآمد کرنے میں گہری دلچسپی ظاہر کی، اور بات چیت میں 200 ملین ڈالر تک کی ممکنہ تجارت کا عندیہ دیا گیا۔
یہ پاکستان کے لیے ایشیا کی تیزی سے ابھرتی ہوئی حلال فوڈ مارکیٹ میں داخل ہونے کا ایک اہم موقع ہے۔
مارکیٹ تک رسائی حاصل کرنے کے لیے ورکنگ گروپ نے تجویز دی کہ حکومت ایک مارکیٹ انٹری پیکیج اپنائے اور اہم پاکستانی برآمد کنندگان اور پروسیسرز کی نشاندہی کرے۔
ان برآمد کنندگان کا انتخاب رضاکارانہ بنیاد پر کیا جا سکتا ہے، بشرطیکہ وہ درکار معیار پر پورا اتریں۔
یہ کمپنیاں ملائشین درآمد کنندگان سے رابطہ کر کے ایم او یوز یا پائلٹ سپلائی معاہدے طے کر سکیں گی۔
مزید یہ کہ گروپ نے سفارش کی کہ "ملائشیا کے لیے تیار” بیف مصنوعات تیار کی جائیں — یعنی ایسی مصنوعات جو صارفین کے تقاضوں جیسے وزن، پیکنگ، حلال سرٹیفکیشن، شیلف لائف، اور قیمت کے معیار سے ہم آہنگ ہوں۔
حکومت کو تجویز دی گئی کہ وہ سمندری راستوں کے ذریعے برآمدات کو ترجیح دے، اور اس کے لیے کاسٹ شیئرنگ اسکیمز، کولڈ چین لاجسٹکس، کسٹمز کی سہولت، اور ملائشین حلال سرٹیفکیشن کو یقینی بنائے۔
تمام گوشت منتخب برآمد کنندگان کے ذریعے ہی بھیجا جائے گا، اور اسے "Pakistan Meat” کے برانڈ کے تحت فروخت کیا جائے گا۔ مصنوعات کے معیار، وزن، کٹس، اور قیمتیں ایک جیسی رکھی جائیں گی تاکہ مشترکہ نیٹ ورکنگ برقرار رہے۔
مزید برآں، حکومت مالی معاونت، برانڈنگ اور مارکیٹنگ مہمات کو فروغ دے گی — جن میں روڈ شوز، ٹیسٹنگ سیشنز، اور دیگر تشہیری تقریبات شامل ہوں گی — تاکہ ملائشیا میں پاکستانی گوشت کے ذائقے کی پہچان پیدا کی جا سکے۔
