استنبول،(مشرق نامہ) 3 نومبر (اے پی پی): وفاقی وزیرِ تجارت جام کمال خان نے استنبول میں منعقدہ کومیسی (COMCEC) کے 41ویں اجلاس کے موقع پر ترکیہ کے وزیرِ تجارت پروفیسر ڈاکٹر عمر بولات سے ملاقات کی۔ ملاقات میں دونوں وزرائے تجارت نے پاکستان اور ترکیہ کے درمیان تجارتی و معاشی تعاون کو مزید مضبوط بنانے کے امکانات پر تبادلہ خیال کیا۔
ترکیہ کے وزیرِ تجارت نے پاکستان کے ساتھ معاشی تعلقات کو وسعت دینے اور تجارتی روابط کو فروغ دینے کی خواہش کا اظہار کیا۔ انہوں نے یقین دلایا کہ آئندہ تجارتی مذاکرات کے دوران ترکیہ، پاکستان کی تجاویز پر مثبت انداز میں غور کرے گا۔
وفاقی وزیر جام کمال خان نے اپنے ترک ہم منصب کو وزیرِ اعظم شہباز شریف کی قیادت میں پاکستانی حکومت کی اصلاحات سے آگاہ کیا، جن کا مقصد نظام میں شفافیت، کارکردگی اور سرمایہ کاروں کے اعتماد میں اضافہ کرنا ہے۔
انہوں نے کہا کہ پاکستان مختلف شعبوں میں ترک سرمایہ کاری کے لیے ایک پرکشش منزل کے طور پر اُبھر رہا ہے۔
پروفیسر ڈاکٹر بولات نے وزیر جام کمال کو 25 نومبر کو استنبول میں ہونے والی حلال ایکسپو میں شرکت کی دعوت بھی دی اور حلال تجارت و صنعتوں میں باہمی تعاون کو مزید گہرا کرنے پر زور دیا۔
دونوں ممالک نے تجارت، سرمایہ کاری اور صنعتی ترقی کے شعبوں میں شراکت کو فروغ دینے کے عزم کا اعادہ کیا، جو پاکستان اور ترکیہ کے مابین قریبی اور برادرانہ تعلقات کی عکاسی کرتا ہے۔
