اسلام آباد(مشرق نامہ): وفاقی وزارتِ تجارت میں وزیرِ تجارت جام کمال خان اور وزیرِ اعظم کے معاونِ خصوصی برائے صنعت ہارون اختر خان کی مشترکہ صدارت میں ہونے والے اعلیٰ سطح اجلاس میں استعمال شدہ گاڑیوں کی درآمد کے ضوابط، ڈیوٹی اور پالیسی اصلاحات پر غور کیا گیا تاکہ غیر قانونی استعمال اور تجارتی استحصال کو روکا جا سکے۔
اجلاس میں وزارتِ تجارت، وزارتِ صنعت و پیداوار، ایف بی آر، پاکستان آٹوموٹیو مینوفیکچررز ایسوسی ایشن (PAMA) اور آٹوموٹیو پارٹس مینوفیکچررز ایسوسی ایشن (PAAPAM) کے نمائندوں نے شرکت کی۔
جام کمال خان نے کہا کہ پری شپمنٹ اور پوسٹ شپمنٹ انسپیکشن سسٹم متعارف کرانے کے ساتھ سخت کوالٹی کنٹرول اقدامات درآمدی اسکیموں کے غلط استعمال کو روکنے میں مدد دیں گے۔
انہوں نے بتایا کہ حکومت نے تجارتی استعمال شدہ گاڑیوں کی درآمد پر 40 فیصد ریگولیٹری ڈیوٹی عائد کی ہے، جو ہر سال بتدریج کم کی جائے گی تاکہ مقامی صنعت کو مقابلے کے قابل اور خود کفیل بنایا جا سکے۔
اجلاس میں بگیج، گفٹ، اور ٹرانسفر آف ریذیڈنس اسکیموں کو یکساں بنانے کی تجاویز پر بھی غور کیا گیا۔
ہارون اختر خان نے اس موقع پر کہا کہ حکومت کی ترجیح شفافیت، سہولت اور نجی شعبے کے ساتھ شراکت داری ہے، تاکہ آٹوموٹیو سیکٹر کو پائیدار اور مسابقتی بنایا جا سکے۔
وزیرِ تجارت نے صنعت کے تمام اسٹیک ہولڈرز کو ہدایت کی کہ وہ طویل مدتی آٹو پالیسی کے لیے اپنی تجاویز پیش کریں، جسے حکومت نومبر تک حتمی شکل دینے کا ارادہ رکھتی ہے۔
