اسلام آباد / کابل(مشرق نامہ): پاکستان اور افغانستان نے رواں ماہ سرحدی جھڑپوں کے بعد تعلقات میں کشیدگی کے باوجود جنگ بندی جاری رکھنے پر اتفاق کر لیا ہے۔
ترکی اور قطر کی ثالثی سے ہونے والے مذاکرات کے دوسرے دور میں یہ پیش رفت سامنے آئی، جنہیں چند روز قبل تعطل کا سامنا تھا۔
ترکی کی وزارتِ خارجہ کے مطابق، فریقین نے امن برقرار رکھنے اور خلاف ورزی کی صورت میں سزا دینے کے لیے ایک مانیٹرنگ و ویریفکیشن میکنزم پر بھی اتفاق کیا ہے۔
اعلامیے میں کہا گیا کہ جنگ بندی کے نفاذ سے متعلق مزید تفصیلات 6 نومبر کو استنبول میں اعلیٰ سطحی اجلاس میں طے کی جائیں گی، جس میں دونوں ممالک کے وزرائے دفاع کی شرکت متوقع ہے۔
اگرچہ معاہدہ ایک بڑی پیش رفت قرار دیا جا رہا ہے، لیکن سفارتی ذرائع کے مطابق دونوں ممالک کے درمیان گہرا عدم اعتماد اب بھی برقرار ہے۔
