نئی دہلی، 29(مشرق نامہ) اکتوبر (اے پی پی): پاکستان ہائی کمیشن نئی دہلی نے بدھ کے روز 2,100 سے زائد سکھ یاتریوں کو ویزے جاری کیے تاکہ وہ بابا گرو نانک دیو جی کی سالگرہ کی تقریبات میں شرکت کر سکیں، جو 4 سے 13 نومبر تک پاکستان میں منعقد ہوں گی۔
دورے کے دوران یاتری گردوارہ ننکانہ صاحب، گردوارہ پنجہ صاحب اور گردوارہ کرتارپور صاحب سمیت مختلف مقدس مقامات پر حاضری دیں گے۔
چارج ڈی افیئرز سعد احمد وڑائچ نے یاتریوں کو دلی مبارکباد دیتے ہوئے ان کے لیے روحانی طور پر بابرکت سفر کی نیک تمنائیں ظاہر کیں۔ انہوں نے کہا کہ حکومتِ پاکستان بین المذاہب اور بین الثقافتی ہم آہنگی کے فروغ کے اپنے عزم کے تحت مقدس مقامات کے دوروں میں سہولت فراہم کرتی رہے گی۔
یہ ویزے 1974 کے دو طرفہ پروٹوکول برائے مذہبی مقامات کے دورے کے تحت جاری کیے گئے ہیں۔
