مانیڑنگ ڈیسک (مشرق نامہ)خضدار کے علاقے نال میں جمعرات کی شب نامعلوم مسلح افراد نے ایک تعمیراتی کمپنی کے کیمپ اور کرشنگ پلانٹ پر حملہ کر کے 18 مزدوروں کو اغوا کر لیا اور متعدد گاڑیوں اور مشینری کو آگ لگا دی۔ لیویز حکام کے مطابق دو درجن سے زائد مسلح افراد نے رات گئے حملہ کیا اور کم از کم آٹھ گاڑیوں کو جلا کر راکھ کر دیا۔ کمپنی کے منیجر ذوالفقار احمد نے بتایا کہ ابتدا میں 20 مزدوروں کو اغوا کیا گیا تھا، جن میں سے دو کو بعد میں چھوڑ دیا گیا۔ اغوا شدہ تمام مزدوروں کا تعلق سندھ سے ہے اور وہ "ڈی بلوچ” نامی کمپنی کے زیرِ تعمیر سڑک منصوبے پر کام کر رہے تھے جو نال کو واشک اور بسیمہ سے ملانے کے لیے تعمیر کیا جا رہا ہے۔ واقعے کے بعد سیکیورٹی فورسز نے علاقے میں سرچ آپریشن شروع کر دیا ہے۔ یہ رواں ہفتے بلوچستان میں مزدوروں کے اغوا کا دوسرا واقعہ ہے؛ چند روز قبل مستونگ میں بھی 9 مزدوروں کو نامعلوم افراد نے اغوا کیا تھا۔ دونوں واقعات کی ذمہ داری کسی گروہ نے قبول نہیں کی۔
