نیویارک، 16(مشرق نامہ) اکتوبر (اے پی پی): اقوام متحدہ کے سیکریٹری جنرل انتونیو گوتیریس نے پاکستان اور افغانستان کے درمیان عارضی جنگ بندی کے اعلان کا خیرمقدم کرتے ہوئے فریقین سے اپیل کی ہے کہ وہ لڑائی کے پائیدار خاتمے پر متفق ہوں۔
اقوام متحدہ کے ترجمان اسٹیفن دوجارک نے جمعرات کو نیویارک میں یو این ہیڈکوارٹرز میں باقاعدہ پریس بریفنگ کے دوران ایک بیان پڑھتے ہوئے کہا،
"سیکریٹری جنرل کو پاکستان اور افغانستان کے درمیان مسلح جھڑپوں کی اطلاعات پر گہری تشویش ہے جن میں متعدد شہری ہلاک اور زخمی ہوئے ہیں، اور وہ عارضی جنگ بندی کے اعلان کا خیرمقدم کرتے ہیں۔”
جب ان سے پوچھا گیا کہ کیا اقوام متحدہ کے سربراہ نے پاکستان اور افغانستان کی قیادت سے براہِ راست رابطہ کیا ہے، تو دوجارک نے بتایا کہ اقوام متحدہ امدادی مشن برائے افغانستان (UNAMA) دونوں فریقین سے رابطے میں ہے۔
انہوں نے مزید کہا:
"سیکریٹری جنرل فریقین سے مطالبہ کرتے ہیں کہ وہ لڑائی کے دیرپا خاتمے پر متفق ہوں، مذاکرات میں شامل ہوں تاکہ شہریوں کا تحفظ کیا جا سکے اور مزید جانی نقصان سے بچا جا سکے۔”
کابل میں یو این مشن نے بھی جنگ بندی کے اعلان کا خیرمقدم کرتے ہوئے ایک بیان جاری کیا۔
بیان میں کہا گیا کہ افغانستان 2021 سے طالبان کے زیرِ انتظام ہے اور اس عرصے میں ہمسایہ ممالک کے درمیان تعلقات میں تناؤ بڑھا ہے۔
پاکستان کا مؤقف ہے کہ افغانستان اپنی سرزمین پر ایسے دہشت گرد گروہوں کو پناہ دے رہا ہے جو بارہا پاکستانی علاقوں پر حملے کرتے ہیں، جن میں کئی عام شہری جاں بحق ہوئے ہیں۔
یو این اے ایم اے (UNAMA) نے یہ بھی کہا کہ اسے تشدد کے نتیجے میں عام شہریوں کی ہلاکتوں کی مستند اطلاعات موصول ہوئی ہیں۔
بیان میں مزید کہا گیا:
"یو این اے ایم اے تمام فریقوں سے اپیل کرتی ہے کہ وہ دشمنی کا دیرپا خاتمہ کریں، شہریوں کے تحفظ کو یقینی بنائیں اور مزید جانی نقصان سے بچیں۔”
مزید برآں، اقوام متحدہ نے تمام فریقین کو یاد دہانی کرائی کہ وہ بین الاقوامی قانون کے مطابق شہریوں کے تحفظ کے لیے امتیاز، تناسب اور احتیاط کے بنیادی اصولوں پر عمل کریں۔
