اسلام آباد(مشرق نامہ):مسابقتی کمیشن آف پاکستان (CCP) نے مرکری (پارہ) سے آلودہ جلد گورا کرنے والی کریموں کے خلاف ملک گیر کارروائی کا آغاز کر دیا ہے۔
یہ اقدام صارفین کو صحت کے سنگین خطرات سے بچانے اور کاسمیٹکس مارکیٹ میں منصفانہ مقابلہ یقینی بنانے کے لیے کیا گیا ہے۔
کمیشن کے آفس آف فیئر ٹریڈ اور مارکیٹ انٹیلی جنس یونٹ کی تحقیقات میں انکشاف ہوا کہ مارکیٹ اور آن لائن دستیاب کئی معروف کریمیں خطرناک حد تک زیادہ مقدار میں پارہ رکھتی ہیں۔ ان میں سے کئی مصنوعات جھوٹے دعوے کرتی ہیں کہ وہ “محفوظ اور مؤثر” ہیں، جبکہ اجزا کی فہرست میں پارے کا ذکر چھپایا جاتا ہے۔
ماہرین کے مطابق پارہ ایک زہریلا عنصر ہے جو گردوں کے نقصان، اعصابی امراض اور جلدی بیماریوں کا سبب بن سکتا ہے، اور دنیا کے بیشتر ممالک میں اس کا استعمال کاسمیٹکس میں ممنوع ہے۔
اس کے باوجود پاکستان میں کئی برانڈز اب بھی ’’فئیرنس، گلو، لائٹننگ‘‘ جیسے گمراہ کن ناموں کے تحت یہ کریمیں فروخت کر رہے ہیں۔
کمپیٹیشن ایکٹ 2010 کی دفعہ 10 کے تحت جھوٹی یا گمراہ کن تشہیر قانونی جرم ہے، جس پر کمپنی کو 7 کروڑ 50 لاکھ روپے تک جرمانہ یا سالانہ آمدنی کے 10 فیصد تک کی سزا دی جا سکتی ہے۔
کمیشن نے ان تمام کمپنیوں کے خلاف کارروائی شروع کر دی ہے جو ان مضر صحت مصنوعات کی تیاری یا فروخت میں ملوث ہیں۔
عوام کو مشورہ دیا گیا ہے کہ وہ ایسی کوئی بھی کریم استعمال نہ کریں جس میں پارہ شامل ہونے کا شبہ ہو، اور جعلی اشتہارات یا غیرمحفوظ مصنوعات کی اطلاع سی سی پی کے آن لائن شکایتی پورٹل پر درج کرائیں۔
